Могойто тосхоной Жаргалма Ширабжалсанова өөрөө урлал хэжэ hураhан (самоучка) хүн юм. Тэрэ нооhон самса, малгай, футболко, сүүмхэ, аршуул, аяга г.м. эдлэл дээрэ буряад хээ угалза, зурагуудые, үреэл хэблэжэ гаргаhан байгаа. Тиихэдээ принтер, пресс, плоттер г.м. мүнөө үеын үнэтэй түхеэрэлтэнүүдые хэрэглэдэг юм. Тэрээндэ багшын ажалай ветеранууд, буряад хубсаhа оёдог Долгоржаб Дармаевна ба Зоя Тагаровна хоёр эжынэрынь хамhалсадаг байна.
Ага тосхондо ажаhуудаг уран дархан Болот Дондоков Сагаалганда зорюулhан шэмэглэл бүтээлнүүдээ табижа, харагшадые hонирхуулаа. Ага найман эсэгын уг бүхэнэй hүлдэ тэмдэгүүдтэй элдэб янзын уран бүтээлнүүдынь уг гарбалаа, ёhо заншалаа, түүхэ домогоо хүндэлдэг, мэдэхэ гэжэ оролдодог хүнүүдтэ тон хэрэгтэй байhаниинь дамжаггүй даа.
Будалан нютагай Балто Батожаргалов хайлааhан, нарһан модоор хуянша (хуян нидхэрдэг модон) хэжэ эльгээhэн байба. Тэрээгээр нидхэрэлгэ хэхэдэ, бэеын шалаа, хуян тарадаг гэжэ мэдэнэбди. Илангаяа үбгэд хүгшэд «нюхуурым асал даа наашань!» гэжэ аша зээнэртээ хэлэжэ байгша һэн.
Зүдхэлиин уран гартан, нютагай музей даагша, хүдөөгэй соёлой байшанай дэргэдэ һэеы хэдэг мастерской нээһэн Дарима Жалсанова ба мастер Цыпелма Бальжинимаева хоёр үзэсхэлэн-яармагта зорюута ерэжэ хабаадаа. Уласхоорондын, хизаарай, тойрогой урашуулай олон харалга-мүрысөөнэй лауреат, дипломант Дарима Батомункуевна «Морин эрдэни» ба «Шэдитэ нооһон» гэһэн кружогуудые ябуулжа, мориной дэлһээр, хониной нооһоор урлал хэхые заадаг юм. Зүдхэлиинхид холисогүй нооhоор хэhэн дүрэмхэнүүдые, үбэлэй дулаан гуталнуудые дурадхаа. Гуталынь буряад угалзануудтай, 2 ондоо нооhоор хэгдэhэн байба. Тиихэдээ кучугур үүлтэрэй хониной нооhон дээрэ элдэб үнгэтэй, бэлэн нооhо абажа хээд, газаа талаhаань үнгэ гаргажа, гуталнуудые улаан гараараа бүтээһэн байгаа.
Зүдхэлиин уран гартанай дулаан гуталнууд дурадхагдаа.
Агын «Далитэ» театрай уран зурааша Дашима Бадмаева даруулга, hаншагай, хүзүүнэй зүүдхэлнүүдые, «Гэр бүлэ» гэhэн хүүхэлдэйнүүдые, басагадай гоёолто, титим, үhэ баридаг тойруулга гэхэ мэтые уранаар хэжэ, харагшадые хужарлуулаа. Адуу малай, ута наhанай hүлдэ тэмдэг болохо «эбэр», «түмэн жаргалан» угалзануудай түхэлтэйгөөр урлалаа бүтээhэн байна. Театрай ба шэнэ маягай хубсаһа урлан оёдог Светлана Нагаслаева буряад дэгэлэй энгэр эсхэн няажа бүтээһэн байгаа.
Ага тосхоной дэлгүүр дээрэ наймаа хэдэг, урлалда улигтай Юурын Энх Туяа интернет хаража, гараараа гоёолтонуудые хэжэ hураа. Басагадай малгайн гоёолто – шанха, хүзүүнэй, шэхэнэй зүүдхэлнүүдые, бугааг гэхэ мэтые шүрэ субадаар, hубhаар хэжэ, үзэсхэлэндэ табяа…
Дэлгэрэнгыгээр 6-дахи дугаарта.
