Түрүүшын мүрысөөндэ hээр шааха дуратайшуулай олоншье hаань, COVID-19 үбшэнэй шалтагаанаар, нэгэ угай оройдоол 2 түлөөлэгшэд, дүн хамта 16 hээршэд тайзан дээрэ гаража, hээр шаагаа. Хэниинь түргэн болзор соо 3 hээр удаа дараалан шаажа хухалнаб, тэрэнь шүүхэ байгаа. Ага-Хангил нютагай Болот Будуев 3 hээр нэгэ секунда долоон хэсэгэй туршада хуха шаажа, абарга hээршэн болоо. Урта нютагай сагаангууд угай, 21 наhатай Амгалан Болотов (1 секунда 71 хэсэг) - шангай 2-дохи, Зугаалайн нохойхонтон омогой Булад Дашиев (1 секунда 82 хэсэг) 3-дахи hууринуудые эзэлжэ, мүнгэн ба хүрэл медальнуудта болон мүнгэн шангуудта хүртөө.
Арадай нааданай илагшад - сагаангууд.
Энэ турнирай тон наhатай hээршэн, баруун уляад омогой, 54 наhатай Бато Базаров Улаан-Yдэ хотоhоо Хүhөөшэ нютагаа ерэжэ, багшаар хүдэлдэг Баир ахайгаа золгоод, «Обоо толгой» мүргэлтэ хададаа хии мориёо хиидхүүлhэн байба. «Манай Ага нютагай hээршэд шадал шандааһатай, бэрхэнүүд бэд даа. Тойрогто заншалта наада иимээр дэмжэжэ байхадань, hээр шааха дуратай залуушуул ургажал байна. Бидэ ахамар зон ехэ баяртай байдагбди. Би Хүhөөшэ нютагайнгаа hээршэдые суглуулжа, «Толон» hониной шангай түлөө мүрысөөндэ хабаададагбди», - гэжэ Бато Цыренович хѳѳрэбэ.
Сагаалганай 5 шатаhаа бүридэhэн эстафетэдэ Ага найман эсэгын угайхид хабаадажа, бодонгууд, сагаангууд ба шарайд омогойхид шалгараа. Мүрысөөнэй дүримөөр, капитанууд урилдаха, бугуули хаяха, тоонто уялаа уяха, hээр шааха, угайхидай нэгэ түлөөлэгшын шагайнуудые мухарюулжа, «мори» гаргахадань, тэрэнэй тоогоорнь хабаадагшад стартhаа нүгөө таладань гүйлдэжэ гараад, булта болоходоо, гар гараа барилсан, һөөргөө финиш руу гүйлдэжэ ерэхэ байгаа.
2021 оной Сагаалганай 2 мүрысөөндэ тон олон оноотой болоһон сагаангууд омогтон түрүү hуури эзэлжэ, тэдэнэртэ кубок, алтан медальнууд ба 4000 түхэриг барюулагдаа. Удаадахи шангай hууринуудта бодонгууд ба хуасай угайхид гараhан байна.
Жалсан ЛУБСАНДАШИЕВ.
