Базаров Самбу (Ага тосхон)
Зугаалай нютагһаа уг гарбалтай, үндэр 95 наһатай.
1944 оной декабриин 3-да сэрэгэй албанда мордоhон байна.
Сэрэгэй мэргэн буудагшын һуралсал гараад, 1945 оной июль hарада 64-дэхи стрелково полкдо мэргэн буудагша ябаа. 1950 ондо 165-дахи танкова батальоной бэшээшээр хүдэлѳѳ.
Агуу Илалтын 76-дахи жэл хүнгэн, энхэ элүүр зандаа угтажа, Майн 9-эй бүхы хэмжээ ябуулгануудта хабаадаба.
Дамбаев Ануфрий (Могойто)
Бооржын аймагай Сагаан-Уула шадар тоонтотой, 1943 оной зун Улаан Армида татагдаһан байна.
Баруун фронтдо 41-дэхи артиллерийскэ бригадада наводчик-буудагша ябаа, удаань 24-дэхи бригадада жолоошоноор алба хааһан.
1947 ондо сэрэгһээ табигдажа, түрэл ажахыдаа малшанаар олон жэлдэ ажаллаһан юм. Үндэр 96 наһатай буурал аха мүнөө аша гушанарайнгаа дунда амгалан тэнюун ажаһууна.
Дамдинов Дашидоржо (Амидхааша)
Урда-Ага нютагта тоонтотой, 1944 оной декабрь hарада дайнда мордоһон байна.
Забайкалиин фронтын 12-дохи агаарай-авиациин армиин бүридэлдэ дайшалхы замаа эхилээ. Шэтын авиачастьда 3 жэлэй туршада алба гараад, Бада станци дээрэ оршодог авиациин полигон эльгээгдэжэ, самолёдуудай буудаг газарта минэнүүдые шалгадаг сапёр ябаа.
Жапов Эрдэни (Зугаалай)
Могойтын аймагай Зугаалай нютагай, 1944 оной хабар сэрэгэй албанда абтаа.
Эрхүүгэй можын Мальта станци дээрэ сэрэгшэдэй бэлэдхэл гараад, тэндэhээ Бооржо руу эльгээгдэhэн байна. Бооржодо 245-дахи истребительнэ дивизидэ харуулай штабта алба хаагаа. Удангүй тэндэhээ Монгол эльгээгдээ. Саашадаа японцуудай эзэлээд байhан Хитадай Чаньшунь, удаань Мукден, Далянь, Порт-Артур хотонуудые сүлөөлэлсэһэн намтартай.
Эрдэни аха мүнөө ехэ хүрьгэнэйдөө гурбан зөөлэниие эдлэжэ hуунхай.
Нимаев Дондок (Хүнхэр)
Байгша оной июлиин нэгэндэ зуун наһаяа гүйсэхэнь.
Энэ ахын дайшалхы зам ба ажалай намтар ехэ баян юм. Тала нютагта үндыһэн хүдэр хүбүүн 18 наһатайдаа сэрэгтэ татагдаһан байна. Забайкальска фронтын 675-дахи артиллерийскэ полкын бүридэлдэ дайн байлдаануудта хабаадаһан.
Хүнхэрэйнгөө ажахыда амжалтатайгаар ажаллажа, Социалис ажалай мүрысөөнэй илагшын нэрэдэ хүртэһэн.
Тимофеев Георгий (Дулдарга)
1944 ондо сэрэгэй албанда татагдажа, Москвагай дэргэдэхи Внуково хотодо оршодог 10-дахи гвардейскэ автотранспортна дивизидэ алба хааһан байна.
Дайнай дүүрэхэдэ, Горьковско һургуулида һуража, радистын мэргэжэл шудалаа. Тэрэнээ дүүргээд, Таманска дивизидэ радистаар алба хааһан намтартай.
Жэл бүри майн 9-эй һайндэрые ветеран хүлеэн байдаг: костюмаа үмдөөд, заабол жагсаалда гарадаг заншалтай.
Эрдынеев Гарма-Доржо (Урта)
Агууехэ Эсэгын дайнай эхилхэдэ, 16-тай байгаа.
1943 ондо сэрэгэй албанда татагдажа, сапёрой курс гараа. Забайкальска фронтдо алба хаажа, Хайлар, Цицикар, Мукден хотонуудые сүлөөлэлсэжэ, Квантун армиие бута сохилсоод, Забайкалиин фронтдо сапёроор дайшалхы замаа үргэлжэлүүлһэн байна. 1948 ондо нютагаа бусаа.
Эрдэни ЧИМИТДОРЖИЕВ.
