Агуу Илалтын һайндэр заншалта ёһоор «Агинский колхозник» танкын хү-шөөгэй дэргэдэ митингээр эхилээ. Митингын үедэ Агын аймагай депутадуудай зүблэлэй түрүүлэгшэ Болот Аюров, дайнай ара талын хүдэлмэрилэгшэ Ангелина Бутина хабаадагшадые һайндэрөөр амаршалһан байна. Удаань Агын 2-дохи дунда һургуулиин һурагша Аюша Самбаев үгэ хэлээд, Эсэгын дайнда хабаадагшадта, ветерануудта баярые хүргөө. Энэл һургуулиин эдир хүбүүд танкын хүшөөдэ гүрлөө табяа, эдир хүбүүд болон басагадай взводууд, барабанщицанууд хабаадаа.
Алдар Солын хүшөөдэ.
Тэрэнэй һүүлээр «Слава» мемориал дээрэ «Пока мы помним, мы живём» гэһэн митинг болоо. Эндэ Агын Буряадай тойрогой сэрэгэй комиссар Мунко Батоев, «Боевое братство» эмхиин түрүүлэгшэ Тумэн Санданов, Агын тойрогой гимнази-интернадай 11-дэхиин һурагша Сергей Гонсоронов амаршалгын, баярай үгэнүүдые хэлэһэн байна. Дайнда алдалан унаһан сэрэгшэдтэ зорюулжа, нарһан гүрлөө табигдаһанай удаа бүгэдэ зон минутын туршада дуугай зогсожо, хүндэлэн ёһолоо.
Самбу Базаров зүүн гарһаа хоердохи.
Тосхоной түб талмай дээрэ үргэлжэлһэн хэмжээ ябуулгын эхиндэ Агын тойрогой гимназиин һурагшад Россиин Федерациин, Илалтын болон Юнармиин тугуудые гаргаа, Агын 1-дэхи дунда һургуулиинхид Баатарнуудай Аллейдэ хүндэтэ харуулда зогсоо, мүн сэсэгүүдые табяа. Һүүлээрнь Эсэгын дайнда хабаадагша Самбу Базаров сэрэгэй үеын «Виллис» авто-унаагаар ерэжэ, тосхоной түб талмай дээгүүр хүндэлэлэй дүхэриг хээд, тэрээндэ үгэ үгтэхэдэнь, «Эгээл шуһата зэбүүн дайнда хабаадагшадай зүгһөө бултаниие Агуу Илалтын һайндэрөөр амаршалнаб. Эсэгын дайнда совет арадай илажа гараһан тухай мартангүй ябаһан залуу үеынхидтэ баярые хүргэнэб. Дайн хэзээдэш бү үзэгдэг!» - гэжэ хэлэбэ. Удаань сенатор Баир Жамсуев, Агын Буряадай тойрогой Захиргаанай хүтэлбэрилэгшэ Буянто Батомункуев, тосхоной захиргаанай толгойлогшо Андрей Дашин гэгшэд ветерануудые, бүгэдэ сугларагшадые Майн 9-эй һайндэрөөр амаршалаа бшуу.
Сенатор Б.Жамсуев амаршална.
Тиигээд Ага тосхоной дунда һургуулинуудай хүбүүд болон басагадай взводууд жагсан алхалаа, гимназиин ба Агын 2-дохи дунда һургуулиин барабанщицанууд хабаадаа, «ДалиТЭ» театрайхид багахан концерт-наада эмхидхээ. Һүүлээрнь Ага тосхоной эмхинүүдэй дунда «В городском саду играет» гэһэн фестиваль, залуушуулай дунда «Отзвуки Победы», дискотекэ г.м. хэмжээ ябуулганууд эмхидхэгдэһэн байна. Үдэшын 10 сагта һайндэрэй салют табигдаа.
Долгор РАДНАБАЗАРОВА.
Жалсан ЛУБСАНДАШИЕВАЙ фото.
