Догойн захиргаанай толгойлогшо Цыцыгма Жамбалова митинг нээжэ, наhатайшуулай зүблэлэй түрүүлэгшэ Владимир Дугаров, дунда hургуулиин директор Бато Ральдин гэгшэд сугларагшадые хани халуунаар амаршалаад, гүрэн түрэдэмнай тохёолдоһон хатуу сагые ба Эсэгэ ороноо аршалhан ба хамалганда дайрагдаhан хүнүүдые hануулга гээшэ илангаяа ургажа ябаһан үетэндэ хэрэгтэй байhыень тэмдэглэһэн байна. Нютагай абьяастад Баяндалай Доржиев Советскэ Союзай Баатар Базар Ринчино тухай поэмын хэhэг уранаар уншаа, ажалай ветеран Цыжидма Шагдарова «Байсын шулуун хүндэ юм» арадай дуу, Жаргал Дашиев «Журавли» дуу сэдьхэл хүдэлгэмөөр гүйсэдхэбэ.
Хүшөө дээрэ мүнхэлэгдэhэн 75 сэрэгшэдэй гурбанай нэгэниинь түрэл нютагаа бусаагүй, дайнда ами наhаяа алдаhан. Тэндэ байһан хамаг зон малгайгаа абажа, минутын туршада дуугай зогсожо, дайнда унаһан, нютагаа ерээд гээгдэһэн сэрэгшэдэй гэрэлтэ дурасхаал хүндэлэн ёһолоо. Залуушуул хүшөөдэ гүрлөө сэсэг табижа, реквием зэдэлээ һэн. Гурбадахи ангиин hурагшад (хүтэлбэрилэгшэнь - Б.Цынгуева) урагшаа гаража, шүлэг уншаа, дунда наhанай үхибүүд һайндэрэй жагсаалда алхалалдажа, дайнда хабаадагшадай дүрэ-зурагуудые баряад зогсоо.
Үрөөнэй нютагайхид митингдэ.
Түрэл нютагайнгаа түлөө үнэнхэ зүрхэнhөө оролдодог Батодоржи Ешиев ветерануудай зүгhөө баярай үгэ хэлэжэ, «булта олоной хэрэгтэ эдэбхитэй хабаадая» гэжэ һануулаа hэн. Батодоржи Цыденович Илалтын үдэртэ зорюулагдаhан hур харбаа эмхидхэжэ, түрэл гаралнуудтаяа суг мүнгэ татажа, шангай жасада оруулаа. Тус мүрысөөндэ Агын тойрогой 93 харбаашад хабаадажа, эсэстэнь Баир Базардашиев (Ага), Соёлма Цырендоржиева (Зүдхэли) ба наhатайшуулай дунда Баир Баясхаланов (Амидхааша) гэгшэд тус тустаа абарга мэргэнэй солодо хүртөө.
Yрөөнэйһөө гарбалтай, Улаан-Yдэдэ ажаhуудаг, 77 наhатай Батосухэ Батомункуев Эсэгын дайнда хабаадагшадай ба хамалганда абтаhан нютагайхидайнгаа нэрэнүүдые архивай дансаар элирүүлhэн. Мүнөө «Yлзы» ТОС-ой түрүүлэгшэ Алексей Торгубаев нютагайхидтаяа суг элдэб түхеэрэлгын ажал оролдосотойгоор хэhэн байна. Иигэжэ багахан сэлеэнэй ажаһуугшад майн 9-эй Илалтын үдэрые эхи эмхитэйгээр, урма баяртайгаар угтаһан байна.
Жалсан ЛУБСАНДАШИЕВ.
