Тойрогой Захиргаанай социальна хүгжэлтын таһагай дарга Розалия Балдоржиевагай тайлбарилһаар, халдабарита үбшэнэй һүжэрһэн ушарһаа энэ жэлдэ лагерьнууд урда жэлнүүдтэл адли олон үхибүүдые амаруулха аргагүй. Энээн тухай Россиин санитарна ахамад эмшэнэй шанга захиралта гаранхай. Тиимэһээ лагерьнууд үхибүүдые угтан абаха арга боломжынгоо 75 хуби тухай амарагшадые амаруулха аргатай байха, нэгэ отряд соо 55 хүнэй орондо 46 хүн байха ха.
Хүүгэдэй амаралгын хаһа эмхидхэхэ тухай тойрогто «Об организации отдыха, оздоровления и занятости детей и подростков» гэһэн тогтоол гаража, тэрээн дээрэ багашуулай ба эдиршүүлэй амаралга зүбөөр эмхидхэхэ тухай бүхы эрилтэнүүд тунхаглагданхай. Ага тосхондо ба тойрогой гурбан аймагта оршодог элүүржүүлгын лагерьнуудта дүн хамта 6285 үхибүүдые амаруулха түсэб табигдана. Мүн тиихэдэ хүдөө нютагуудай һургуулинуудта үдэрэй халаанай 48 лагерь хүдэлхэ юм. Тэдэ лагерьнууд хорин нэгэн үдэрэй туршада хүдэлхөөр хараалагдана. Тусхайлхада, профильно 12, ажалда дүршүүлдэг 5 лагерь ажал ябуулха. Ага тосхондо уушханай ханяаданда нэрбэгдэһэн хүүгэдые амаруулха 1 лагерь хүдэлхэ юм. Тиихэдэ аймагуудай дэбисхэр дээрэ оршодог «Дружба», «Нарһан», «Наран», «Аршаан» лагерьнууд үүдэеэ сэлихэ. Бүхыдөө тойрогой 525 эмхи зургаанда лагерьнууд ажалаа ябуулха ха. Агын гимназиин багшанар Ножын нуурай эрьедэ майхан лагерь эмхидхэхээр түсэблэнэ. Лагерьнууд гурбан халаанда ажал ябуулха бшуу.
Үдэрэй халаанай 48 лагерьта 4870 үхибүүдые амаруулхаар түсэблэгдэнэ. Агын тойрогой гимназиин ажалтадай эмхидхэхэ майхан лагерьта 30 үхибүүд хүдөө сэбэр агаарта бэе махабадаа хүдэржүүлхэ бшуу. «Нарһан» лагерьта нэгэ халаанда 225 үхибүүд ябахаар түсэблэгдэнэ. Харин «Дружба» лагерьта нэгэ халаанда 110 багашуул амарха. Хоёрдохи халаан буряадай «Алтаргана» фестивалиин үедэ тудаха. Нааданда ерэһэн айлшад амаралгын булангуудаар ябажа хараха юм.
Эрдэни Чимитдоржиев.
