Хүдөө нютагуудые хүгжөөхэ зорилготой гүрэнэй программын хэмжээндэ Агын аймагай Урда-Ага нютагта арба гаран объект болбосон түхэлтэй болгогдоно ба шэнэдхэн заһабарилагдана.
Тээсгэн Агын аймагай захиргаанай толгойлогшо Жаргал Жапов Урда-Ага нютаг ошожо, барилгын объектнүүдые ябажа хараһан байна. Жэшээнь, 2000-аад онуудай эхиндэ баригдаад, үнинэй заһабарилгада ороогүй, хүйтэн, хуушарһан «Теремок» хүүгэдэй сэсэрлигтэ хүрөө. Мүнөө багашуулай 85 һууритай гуламта заһабарилха ажал дүүрэнтэжэ байнхай. Тэндэ шэнэ сонхонууд табигдаа, палааха болон үһээнь һэлгүүлэгдээ, сэсэрлигэй байшан газаа талаһаа дулаалагдаад, мүнөө үеын материалаар хушагдаа. Мүн тиихэдэ дулаасуулгын системэ шэнэлэгдэһэн байна. «Теремок» хүүгэдэй сэсэрлигэй хорёо соо хүүгэдэй наадаха талмайнууд зохёогдоо.
Нютагай һургуулиин дэргэдэхи интернадта газаа досоогүй капитальна заһабарилга хэгдээ, санитарна таһалганууд, хүбүүд басагадай душевой таһалганууд байгуулагдаа. Гадна һургуулиин хүүгэд футбол, волейбол, баскетбол наадаха, воркаут дээрэ, хүнгэн атлетикээр бэеэ һорихо аргатай болохонь. Ушар гэхэдэ, тус интернадһаа гадна «САКС» подрядна эмхи һургуулиин дэргэдэ олон үүргэтэй тамирай талмай зохёогдоно. Тиихэдэ «Урда-Ага» тамирай болон элүүржүүлгын комплексын оройн хушалта, палааха, дулаасуулгын системэ һэлгүүлэгдэбэ. Тэрээнһээ гадна худаг, соёлой байшаншье заһабарилагдажа, нютагай шарай һэргэхэнь.
Долгор РАДНАБАЗАРОВА.
