Тээсгэн Агын Буряадай тойрогой Захиргаан соо тойрогой байгуулагдаһаар 85 жэлэй ойн баярта зорюулагдаһан баяр ёһолол үнгэргэлгөөр эмхидхэлэй хорооной зүблөөн болоо.
Тус зүблөө Агын Буряадай тойрогой Захиргаанай хүтэлбэрилэгшэ Буянто Батомункуев хүтэлэн ябуулаа. «2022 оной эхинһээ мүнөө хүрэтэр үнгэргэгдэжэ байһан бүхы хэмжээ ябуулганууд Агын тойрогой байгуулагдаһаар 85 жэлэй ойдо зорюулагдана. Тойрогой ойдо зорюулагдаһан баяр ёһолол сентябриин 26-ай үдэр эмхидхэгдэхэ. Мүнөө үедэ бэлэгүй байдал тохёолдоод байна: коронавирус һүжэрэнхэй, мүн Украинада сэрэгэй тусхай операци ябуулагдажа байна гээшэ ааб даа. Тиимэһээ хэмжээ ябуулгануудые үнгэргэхэ, болихо тухай зоной һанамжа асатажа магад. Минии һанамжаар, тойрогой ойн баяр тэмдэглэхэ ушартай. Зүгөөр соморхоноор аад, удха шанартайгаар үнгэргэхэ хэрэгтэй», - гээд тэрэ хэлэбэ.
Агын Буряадай тойрогой Захиргаанай социальна хүгжэлтын таһагай дарга Розалия Балдоржиевагай мэдүүлһээр, сентябриин 26-ай үглөөгүүр тойрогой һуралсалай бүхы эмхинүүдтэ баяр ёһололой линейкэ үнгэргэгдэхэ, һуралсалай эмхинүүдтэ нэбтэрүүлэгдэһэн «Разговор о важном» түлэблэлэй хэмжээндэ класс, бүлэг бүхэндэ тойрогой 85 жэлэй ойн баярта зорюулагдаһан классна часууд эмхидхэгдэхэ.
Тойрогой ойн баярай хэмжээндэ уласхоорондын хабаадалгатай нютаг можонууд хоорондын эрдэмэй-дүршэл абалгын хуралдаа Агын багшанарай мэргэжэл дээшэлүүлгын институдай хайшан гэжэ, ямар секцинүүдтэ хубаажа эмхидхэхэ тухай тус эмхиин захирал Лхама Рабданова тобшохоноор мэдээсээ. Энэ хуралдаан онлайн аргаар үнгэргэгдэхэ, 5 секцеэр хүдэлхэ юм. Мүн Ц.Жамцараногой нэрэмжэтэ номой сангай ажалтад этнографическа диктант үнгэргэлгэ эмхидхэхэ. Дуратайшуул наһанай 3 бүлэгтэ хубааржа, онлайн гү, али офлайн аргаар хабаадаха аргатай байха.
Агын Буряадай тойрогой Захиргаанай хүтэлбэрилэгшын орлогшо Билигма Будаева баяр ёһололой программатай танилсуулаа, үндэһэн соёл хүгжөөлгын таһагай дарга Хандама Цыденова соёлой хэмжээ ябуулгануудые эмхидхэлгээр тоосоһон байна.
Долгор РАДНАБАЗАРОВА.
