Сентябриин 24-дэ Агын Буряадай тойрогой 85 жэлэй ойн баярта зорюулагдажа, дүрэ буляалдаата барилдаагаар Алдар Цыденжаповай дурасхаалта турнир түрүүшынхеэ үнгэргэгдэхэнь.
Тиимэһээ тээсгэн тойрогой Захиргаанай хүтэлбэрилэгшэ Буянто Батомункуевай ударидалга доро энэ турнир үнгэргэлгөөр эмхидхэлэй хорооной зүблөөн татагдаа. «Бүргэд» тамирай комплекс соо, мүн 2006 ондо түрэһэн ба доошо наһанай эдиршүүлэй хоорондо үнгэргэгдэхэеэ байһан турнирта бэлэдхэлэй, эмхидхэлэй ямар ажал ябуулагдаһан тухай тойрогой Захиргаанай физическэ культура болон тамир хүгжөөлгын таһагай дарга Булат Бальжинимаев мэдээсээ. Тэрэнэй мэдүүлһээр, мүрысөөнэй дүрим баталагдаад, хабаадагшадта эльгээгдэнхэй, гаршын сметэ бэлдэхэ г.м. асуудалнууд шиидхэгдэнхэй. Коронавирусэй дэлгэрһэн ушараар энэ үбшэ һэргылһэн бүхы эрилтэнүүд сахигдаха, хинагдаха юм.
«Бүргэд» комплексын захирал Бэлик Дамдиновай хэлэһээр, мүрысөөнэй дүрим, урилганууд эльгээгдэнхэй. Буряад ороной, Эрхүүгэй можын түлөөлэгшэд лаб хабаадаха тухайгаа мэдүүлээд байна. Могойтын аймагай хүгэдэй болон эдиршүүлэй тамирай һургуулиин һоригшо, дүрэ буляалдаата барилдаагаар Россиин тамирай мастер Жаргал Жалсанов ахамад судьягаар ажаллахаар хараалагдана. Мүрысөөндэ хабаадахаяа ерэһэн эдиршүүлые байрлуулха талаар асуудал гарахагүй гээд хэлэгдээ.
Долгор РАДНАБАЗАРОВА.
