«Уужам, тэнюун сэдьхэлтэй...»
Аба эжын хайрата хүбүүнэй, аша, зээгэй, ахайн ами наһан оршолонто дэлхэйе эршэ зоригоор, алдар солын охёор гэрэлтүүлэн, һолир мэтэ үнгэрхэ хубитай байгаа гү?..
Эдик сэрэгшын бүлэдэ хүмүүжүүлэгдээ, гурба наһатайһаа сэрэгэй мэдэсэнүүдые бэедээ шэнгээһэн. Норполов Доржо абань Россиин Федерациин Зэбсэгтэ хүсэнүүдтэ 25 жэл алба хаажа ябана. Эдик 6 һургуули һэлгэһэн, харин энээндэ нэгэшье ядалдаагүй – суг һурадаг нүхэдтэеэ, үүринэртэеэ, багшанартаяа хэлэеэ ойлголсоод лэ ябаһан. Һургуулида һайнаар һураа. Соёлма Мунко-Баторовна эжынь хөөрэһөөр, Эдик нэгэшье уйдажа байдаггүй, бүхы юумэ һайн тээшэнь һанадаг, ямаршье ушарһаа гараха арга олохо, багаһаа хүтэлбэрилхы шадабаритай һэн. Абынгаа командировкодо, ученидэ ошоходо, гэртээ бүхы туһалагшань байһан.
Абань Оловяннын аймагай Степь станцида сэрэгэй алба эхилээ. Һүүлээрнь Үлеэтын аймагай Горный-1 тосхон эльгээгдэхэдэнь, Эдик 2002 ондо тэндэ 1-дэхи ангида орожо, 3-дахиие дүүргээ. Тиихэдэ абынгаа хүтэлбэри доро боксоор бэеэ һорижо, бэшэ үхибүүдтэл адли бүмбэгэ намнажа, «войнушка» наадажа, Эсэгэ орондоо дуратай байха тухай фильмүүдые хаража, хүхюун хүүгэд наһанай охиндо ябаа. 2005 ондо Доржо Норполов М.Фрунзиин нэрэмжэтэ Россиин Федерациин Зэбсэгтэ хүсэнүүдэй общевойсковой академидэ һурахаяа Москва ошоо һэн. Эдик эжытэеэ хүгшэн абындаа байжа, 4-дэхи ангида Сагаан-Шулуутайн дунда һургуулида һураа. Тэндэ дүрэ буляалдаата барилдаанай секцидэ ябажа, тамирай энэ янзын оньһон аргатай танилсаа һэн. Тиигээд гэр бүлэнь абадаа Москва хото зөөгөө бэлэй. Эдик «Содружество» гэжэ Москвагай 632-дохи һургуулида ороходоо, тамаралгаар бэеэ һорижо, боксоор шадабарияа мүлижэ эхилээ. 2007 ондо академиин һүүлээр абынгаа Комсомольск-на-Амуре эльгээгдэхэдэ, 18-дахи һургуулиин 5-дахи ангиин Эдик хэшээлнүүдэйнгээ һүүлээр дивизиин тамирай танхим соо үдэр бүри дүрэ буляалдаата барилдаагаар бэеэ һоридог байгаа. Тэрэ жэлэй эсэстэ абынь Шэтэ эльгээгдэхэдэ, Шэтын 1-дэхи һургуулида 7-дохиһоо 10-дахи анги болотор һураа. Тэндэ 10-дахи «сэрэгэй» ангида орожо, сэрэгшэ болохо гэһэн ерээдүйнгөө мэргэжэл шэлээ бэлэй. Тамираар һорилгоёо эдэбхитэйгээр үргэлжэлүүлээ һэн. 2010 оной эсэстэ абань Хабаровск эльгээгдэжэ, Эдик армейскэ гар тулалдаагаар бэеэ һорижо эхилээ.
Эдик дунда һургуулияа амжалтатай дүүргээд, Советскэ Союзай маршал К.К.Рокоссовскиин нэрэмжэтэ Алас Дурнын общевойсковой Жуковай орденто сэрэгэй дээдэ училищида ороо. Һуралсалайнгаа хажуугаар армейскэ гар тулалдаагаар һорилгоёо үргэлжэлүүлжэл ябаа. Тиигээд 2018 ондо училищи улаан дипломоор дүүргэжэ, Примориин хизаарай 59-дэхи мотострелково бригадада взводой командирай тушаалда томилогдоо һэн. Удаадахи жэлэй эсэстэ Хабаровскда тусхай томилолгын 14-дэхи бригадын спецназай бүлэгэй командирай тушаалда дэбжүүлэгдээ. «Хүбүүмнай дүршэлөө үргэдхэхэеэ һананаб гэжэ хэлээ. «Запад-2021» ученидэ шалгаржа, мүнгэн шангаар болон «За творческий подход и нестандартные действия при выполнении учебно-боевых задач» гэһэн кубогаар шагнагдаа һэн. Кубогыень дурасхаал болгон гамтайгаар хадагалдагбди», - гэжэ эжынь хөөрэнэ.
Эдик ходо бэеэ һорижо, ехэ амжалта туйлажа ябаа: армейскэ гар тулалдаагаар Хабаровскын хизаарай, Сибириин ба Алас Дурнын абарга болоhон, ММА-гай дүримгүй тулалдаанда Хабаровскын хизаарай мүрысөөндэ шангай һуурида гараа бэлэй. Мүн армейскэ гар тулалдаагаар, боксоор, кикбоксингоор ба сэрэгэй олон мүрысөөгөөр мастерта кандидадай нэрэ зэргэтэй юм.
2022 оной январь һарада Беларусь гүрэн ошоо. Эжынь иигэжэ дурсана: «Эдик учениин удаан үргэлжэлхэ тухай дуулгаа. Намда сэхэ бүхыень хэлэнэгүй гэжэ мэдэрээб. Хүбүүмнай һанааем зобоохогүй гэжэ оролдодог һэн. Илангаяа Элла дүүдээ энхэргэнээр хандадаг, хүүгэднай хоорондоо эбтэйнүүд. Хайрата хүбүүмнай үгы гэжэ мэдэрхэнь ехэ хүндэ, маанадтаа дайлалдажал ябаһан мэтэ... Эдигэй гэртээ байхада, энеэдэн, шаг шууяан таһалдадаггүй һэн. Бүхы хүнэй һанаа заһаха, урмашуулха, ахир, зориггүй хүндэ найдал түрүүлхэ гэжэ багаһаа оролдожо байдаг бэлэй. Би эжы хадаа хүндэ туһалхадаш, өөртэш туһа болохо гэдэг һэм. Хүбүүмнай уужам, тэнюун сэдьхэлтэй, жаахан үхибүүдтэ дуратай, амитадта энхэргэн, хүндэ ходо туһалха гэжэ оролдодог бэлэй.
Бидэ Доржо нүхэртэеэ хүбүүнэйнгээ амжалтаар омогорходогбди. Эдигнай маанадайнгаа найдамтай түшэг тулгуури байгаа. Абатаяа бүхы һанаһанаа хубаалдадаг, сэрэгэй асуудалнуудаар зүбшэлсэдэг һэн…»
(Үргэлжэлэлынь 7-дохи дугаарта уншахада болоходо).
Нордоп БАБУЕВА.
