Могойто тосхондо ажаһуудаг, волонтёр Оюна Мункуеватай хөөрэлдөө эмхидхэбэбди.
- Оюна Дугаровна, уншагшадтамнай өөр тухайгаа хөөрэжэ үгыт.
- Минии тоонто Ага-Хангил нютаг болоно. 1991 ондо Рим ба Цымжидма Цыденовүүдэй гэр бүлэдэ түрэһэнби. Агын багшанарай колледж дүүргээб. Нүхэрни Ага-Хангилай, контрактаар Бооржодо алба хаажа байһанаа жэл тухай тусхай операцида хабаадажа ябана. Гурбан хүүгэдтэйбди: ехэ хүбүүмнай 7-дохи ангиин, басагамнай 6-дахиин, бага хүбүүмнай 1-дэхи ангида һурадаг. Нютагтаа волонтёрой ажал ябуулнаб. Тусхай операцида ябаһан хүбүүдтээ арга шадал соогоо туһалха гэжэ оролдодогбди. Тепловизор, квадрокоптер, глушитель гэхэ мэтые абадагбди. Эндэнэй авто-унаа абажа эльгээгээбди.
- Хэзээнһээ волонтёрой ажал үүсхэнэбта?
- Ханилһан нүхэрни, дүү хүбүүдни баруун тээ ябаа. Сэрэгшэдтэ ямаршье туһаламжа, тэдхэмжэ хэгдэнэгүй гэжэ мэдэжэ байдаг һэм. 2022 оной сентябрь һарада сэрэгэй албанда хүбүүдые татажа эхилээ. Ошохоёо байһан хүбүүдэй сэрэгэй хубсаһаар хангаагдаагүй байхадань, түргэн сагай туршада мүнгэ татажа, тэдэниие хубсалуулаабди, спальна мэшээгһээ эхилээд хэрэглэхэ хэрэгсэлнүүдыень абажа үгөөбди. Байлдаан соогуур хамгаалгын хубсаһан яаха аргагүй хэрэгтэй ха юм. Тэрэ гэһээр ажал хэгдэжэл байна.
- Тэндэ ябаһан сэрэгшэдтэ мүнөөнэй технологиин квадрокоптер, тепловизор аргагүй туһатай...
- Тиимэ даа. Мүнөө технологиин хүгжэжэ байһан сагта холоһоо ябуулдаг беспилотно квадрокоптер хэрэгтэй болодог. Энэ хэрэгсэлээр тагнуул хэхэдэ, буугай һомо хаяхада гэхэ мэтэ хэрэгтэй. Тепловизор ой модон соо хороод байһан дайсанай танк, бронетранс-портёрнуудые элирүүлдэг. Глушитель снайпернуудта хэрэгтэй болодог. Коллиматр гээшэ буугай хэрэгсэл, хараадаа абан шагаахада хэрэгтэй. Иимэ хэрэгсэлтэй байхадаа, сэрэгшэ харанхыда буудаха аргатай бшуу. Тусхай операциин һая эхилээд байхада, эдэ хэрэгсэлнүүд үнэтэй болохоһоо гадна хоморой болоод байгаа. Москвада байдаг нютагайнгаа хүбүүдтэ гаража, эдэниие захижа асаруулдаг байгааб. Һүүлдэнь нүхэртэеэ уулзахаа Крым ошоо һэм. Тэндэһээ сэрэгшэдтэ хэрэгтэй хубсаһа чемоданаар дүүрэн абаад ерээб. Мүнөө амар болоо, интернедэй Вайлдберизда бүхы юумэн байдаг болоо.
(Үргэлжэлэлынь 27-дохи дугаарта уншахада болохо).
Валентина ЦЫРЕНЖАПОВА.
