Элинсэгүүднай нооһо даража, хубсаһа хунар бүтээдэг байһан гэжэ мэдэнэбди. Тэрэ заншал мартагдан алдаашье һаа, мүнөө сагта һэргээгдэжэ байһаниинь һайшаалтай. Дарима Жалсанова мориной дэлһээр, хониной нооһоор гайхамшагта гоё хубсаһануудые бүтээжэ, нютагтаа, холо ойгуур эмхидхэгдэдэг үндэр хэмжээнэй хэдэн мүрысөөнэй илагша болоһон юм. Тойрогойнгоо нэрэ хүндые дээшэнь үргэжэ ябадаг зоной нэгэн.
Нютагаа суурхуулаа
Һур харбалгаар Россиин мүрысөөнэй үедэ Дарима Жалсановатай уулзахадамнай, юудэн малгайн мастер-класс харуулжа байгаа. Тиибэшье сүлөө сагаа оложо, маанадта иигэжэ хөөрэбэ: «Мүнөө жэл «75 мастеровых сёл Забайкалья» гэһэн фестиваль Арей нуурай дэргэдэ эмхидхэгдээ бэлэй. Нёдондо энэ фестивальда илагшадай шанда нютагаараа хүртөө бэлэйбди. Тииһэнэйхи мүнөө хүндэтэй мастернуудай тоодо ябаабди. Нёдондо жэлэй фестивальда Зүдхэли нютагай уран гартан «Лучшее мастеровое село» гэһэн янзада илаабди. Тиихэдээ тэндэ нютагаймнай урдаа хараха уран гартан ажалнуудаа дэлгээгээ һэн. Тоолобол: Тамара Левковская хушалта, дэрэнүүд дээрэ элдэб янзын угалзануудые оёо. Үнгэ бүриин сэсэгүүдэй дүрэнүүдые бүд дээрэ оёод, тэрэнээ рамада һуулгажа, үлгэхөөр болгоод, үзэсхэлэндэ дэлгээгээ һэн. Саяна Дориевагай бүтээһэн хүүхэлдэйнүүдэйнь хэнэйшье анхарал татадагынь мэдэнэбди. Нарин нягтаар урлаһан ажалнуудынь үндэр хэмжээнэй мүрысөөнүүдтэ иладаг гээшэ ааб даа. Саяна Бальжинимаевагай урлал баһал һонин. Бүд, али хубсаһан дээрэ хэбээр угалза болон зурагуудые гаргана. Аюр Бальжинимаев бүд нэхэдэг станок хэрэглэжэ, мастер-класс харуулаа. Бишигма Тумуровагай улаан бургааһа гүрэжэ хэһэн амһартанууд бултанда һайшаагдаа. Пильжидма Жигжитжапова бүдэй үртэһөөр элдэб янзын гэрэй шэмэглэлнүүдые оёжо, олониие һонирхуулаа. Доржи Тумуров модо һиилэжэ амитадай дүрсэ, ташуур, шабдаа гэхэ мэтые бүтээжэ, зоной анхарал татаа. Хажуугаарнь би хубсаһанай суглуулбари дурадхааб, хүүгэднай дуратайгаар үмдөөд ябаа. Эдэ бүгэдые шүүгшэд хаража, ажалыемнай үндэрөөр сэгнэһэндэнь баяртай байгаабди.
Мүнөө фестивалиин нээлгэдэ хүүгэд дуратайгаар хубсаһанай суглуулбари үмдэжэ хабаадаа. Зоригто Дашибалов туг үргэлсөө, Адиса Ойдопова хатараа. «Дангина» хубсаһанай суглуулбари дээрээ нэмэжэ, үшөө нэгэ хубсаһа оёод абажа ошоо һэм. Энэ тэрэ мүрысөөнүүдэй болоходо, тон түрүүн хубсаһа үмдөөд ябаха хүүгэдһээ: «Яахамнайб? Хабаадахамнай гү?» – гэжэ һурадагби. Хүүгэдэй дуратайгаар «Хабаадая!» гэжэ хэлээл һаань, бүхыгөөрөө ажал руу шунгажа, хубсаһыень бүтээдэгби».
