Ага ба Дулдарга
Үглөөнэй 9 сагһаа эхилжэ, Дулдаргын ба Агын аймагуудай бүхэшүүл хибэс дээрэ уригдаа.Түрүүн эдиршүүл хаба шадалаа туршалсажа, танхимаар дүүрэн шаг шууяан дуулдажа эхилээ. Аймагуудай һоригшод эгээл эрхим бүхэшүүлһээ шиираг, шандааһатай, дүрэтэй барилдаашадые шэлэжэ, мүрысөөндэ хабаадуулна. Мүрысөө хүтэлэгшэдэй тайлбарилһаар, тойрогой, хизаарай, Буряад Уласай, Алас Дурнын федеральна тойрогой мүрысөөнүүдэй шангуудта хүртэһэн, абарга болоһон эдиршүүл түрэл аймагуудаа түлөөлөө. 2007-2008 онуудта түрэһэн хүбүүд харагшадта эрхим һайн барилдаа харуулбад. Барилдаанай үедэ эдир тамиршадай һоригшод хүмүүжэмэлнүүдэйнгээ зүбөөр дүрэ хэрэглэжэ шүүхын тула элдэб заабаринуудые хэлэнэд. Эдиршүүлэй уулзалга тэнсүү байдалда үнгэрөө. Хибэс дээрэ 18-36 хүрэтэр наһанай шадал дундаа ябаһан эрэшүүл дүрэ мэхэеэ буляалсаа. Баян дүрэтэй ветеранууд хаба шадалаа дахяад туршалсаһан байна.
Нээлгэ
Үдын 12 сагта мүрысөөнэй нээлгын баяр ёһолол эмхидхэгдээ. Үбэр Байгалай хизаарай Засагай газарай түрүүлэгшын орлогшын – тойрогой Захиргаанай хүтэлбэрилэгшын уялга дүүргэгшэ, мүрысөөнэй эмхидхэлэй хорооной түрүүлэгшэ Базар Дугаржапов, сенатор Баир Жамсуев, Бадма Цыреновэй хүбүүд Цырен ба Чингис Цыреновүүд, хизаарай ба Буряад Уласай барилдаанай федерацинуудай түрүүлэгшэнэр Дашинима Батоболотов, Чимит Бальжинимаев, мүрысөөнэй ахамад шүүгшэ Владислав Бардаханов ба бусад айлшад амаршалгын үгэнүүдые хэлээ.
Хэнэйшье мэдэһээр, гүрэн доторнай бэлэгүй саг тохёолдонхой: Украинада сэрэгэй тусхай үйлэ хэрэгтэ нютагаймнай олон хүбүүд эрэлхэг зоригтойгоор дайлалдажа, баатаршалга харуулна, зариман Эхэ оронойнгоо түлөө хайрата ами наһаяа үгэнэ. Нээлгын үедэ сэрэгэй тусхай үйлэ хэрэгэй газарта баатарай үхэлөөр алдалан унаһан сэрэгшэдэй дурасхаал хүндэлжэ, бүгэдэ сугларагшад минутын туршада дуугүй зогсоо.
(Үргэлжэлэлынь 47-дохи дугаарта уншахада болохо).
Эрдэни ЧИМИТДОРЖИЕВ.
