Агын тойрогой үзүүр хүбүүдэй нэгэн Баир Цырендоржиевые таниха, мэдэхэгүй хүн үгы шахуу. 2012 ондо Великобританиин Лондондо үнгэргэгдэһэн Паралимпиин нааданай һүүлээр Баир Жамсоевичой Тимур шабитаяа Агаяа хоёр алтан медальтай бусахадань, нютагайхиднай һүр жабхалантайгаар угтаһан гээшэ. Түүхэтэ тэрэ сагһаа хойшо һоригшын нэрэ олондо бүришье мэдээжэ болонхой. Олон үхибүүд һоригшодо заалгахаяа һур харбаанай секцидэ ябажа эхилһэн байна.
Баир Жамсоевичые 65 на-һанайнь ойгоор амаршалан, тэрэнэй баян намтар, тамиршанһаа бэлигтэй һоригшо болотор ургалгын ута зам тушаа бэшэхэмнай. Тэрэ Жамсын Цырендоржын ба Бальчинай Мэдэгмагай гэр бүлэдэ 1959 ондо Ага тосхондо түрэһэн намтартай. Зургаан хүүгэдэй гурбадахи үринь болодог. Абань Эсэгын дайнай ветеран, эжынь бүхэли наһаараа хэблэлэй ажалда – типографида олон жэл хүдэлһэн. Абань эбэр номоор харбадаг байжа, тамирай энэ янзада хүүгэдээ һургаһан. Мүрысөөнүүдэй болоходо, хүбүүдынь абаяа дахажа, зураахай хаана болоноб, соло хаана дууданаб тиишээ шамдадаг һэн.
Баир хүбүүн Ага тосхоной 1-дэхи һургуулида һурахадаа, түрүүн эбэр номоор харбаа, һүүлдэ классическа номоор харбадаг болоһон. Баир Цырендоржиев өөрынгөө үеын хүүгэдтэй тамирай танхим соо үдэшэ бүхэндэ сугларжа, һорилго хэхэ. Түрүүшын һоригшодой нэгэн Доржи-Ханда Аюшиев, Дашинима Норбоев Баирта һурша номын хүбшэ татажа, мэргэнээр харбахые һургалсаһан гээшэ. Тиимэһээ Баир Жамсоевич түрэһэн абадаа, Доржи-Ханда Аюшиевтэ, Дашинима Норбоевто баяртай байдаг юм. Эдэ бэрхэ һоригшодой аша оролдолгоор эдир тамиршан Агын аймагай, тойрогой мүрысөөнүүдтэ хабаадажа, эрхим дүнгүүдые туйладаг болоо. Дунда һургуулиин һүүлээр Шэтэ хотодо Үбэр Байгалай сэрэгэй тойрогой 15-дахи тамирай ротодо сэрэгэй алба хааһан шуу. Хоёр жэлэй туршада эрэ хүнэй уялгата алба хаагаад, Хабаровскда физическэ культурын ба тамирай дээдэ һургуулида оюутан боложо ороо һэн. Хотодо 5 жэл һуража, тамирай багшын үнэмшэлгэтэй боложо гараа.
(Үргэлжэлэлынь 2-дохи дугаарта уншахада болохо).
Эрдэни ЧИМИТДОРЖИЕВ.
