- Людмила Сандановна, нэн түрүүн өөр тухайгаа хөөрэжэ үгыт.
- Би Зүдхэли нютагта бодонгууд угай Жимба Санданай гэр бүлэдэ 7-дохи үринь боложо түрэhэн намтартайб. Багаhаа театрта дуратай hэм. Зүдхэлиин арадай театрай найруулhан зүжэгүүдые алдангүй хаража үндыгөөб. Зүдхэлиин дунда hургуулида hуража ябахадаа, театрта наадажа эхилээб. Тиихэдэ Аюша Бортоевой хүтэлбэри доро «Балжан хатан» зүжэгтэ наадаад, лауреадай нэрэ зэргэдэ хүртэhэнби. Һургуулияа дүүргэхэдээ, суг hураhан басагадтаяа – мүнөө Россиин Федерациин габьяата артист Билигма Ринчинова, Амидхаашын «Улаалзай» арадай хатарай ансамблиин хүтэлбэрилэгшэ Цыцыгма Чернинова гэгшэдтэй соёлой hургуулида hурахаяа Улаан-Үдэ хото ошоо hэмди. Тэрэ гэhээр олон жэл үнгэрөө, гурбуулаа соёлой һалбарида хүдэлhөөр зандаабди.
Буряад Уласай соёлой училищида hуража ябахадаа, бэлигтэй актёр, режиссёр Владимир Кондратьев ба Алхана нютагhаа гарбалтай, Буряад Уласай гүрэнэй цирк байгуулhан Майдари Жапхандаев гэгшэдтэ заалгааб, театрай ажалай онсо шэнжэтэй hайнаар танилсажа гарааб. 1996 ондо «Актёр театра» гэhэн мэргэжэлтэй дүүргээ hэм. Училищиин hүүлээр ажал хэhэн газарнуудни олон: Гүнэйн дунда hургуулида, Зүдхэлиин, Үзөөнэй, Дулдаргын соёлой байшануудта хүдэлөөб. Үзөөндэ хүдэлжэ байхадаа, «Эхын найдал», hүүлдэнь Даширабдан Батожабайн «Малшад» гэhэн зохёолоор зүжэгүүдые найруулаа hэм. Эдэ түрүүшымни туршалганууд байгаа. Тэдэ зүжэгүүдни тойрогой мүрысөөнүүдтэ шангай hууринуудта хүртэжэ, маанадта дали жэгүүр ургуулһандал hанагдаа бэлэй. Дулдаргын соёлой байшанда хүдэлжэ байхадаа, «Эдиршүүл» гэhэн хүүгэдэй театральна кружок байгуулааб. Тэндэ ябаhан хүүгэд түрэлхи хэлэтэй болоо. Шүлэг уншажа, дуу дуулажа, тайзан дээрэ наадажа hураа, ёhо заншалтаяа танилсаа. Кружогой гэшүүд аймагай, тойрогой хэмжээндэ эмхидхэгдэhэн мүрысөөнүүдтэ шангай hууринуудые эзэлээ hэн.
(Үргэлжэлэлынь 2-дохи дугаарта уншахада болохо).
Валентина ЦЫРЕНЖАПОВА.
