Дэлхэй дээрэ ажаһуужа байһан ямаршье арадта малгай ехэ удха шанартай байдаг. Буряадуудай үндэһэн хубсаһанда заабол малгай оролсодог юм. Буряад хүн малгайгаа үмдэхэдөө, тэнгэриин ехэ бурхадһаа хамгаалалтатай болоно гэжэ тоологдодог. «Буряад малгай хүхэ торгоор оёгдоходоо, хүхэ мүнхэ тэнгэри тэмдэглэнэ. Мүн малгайн залаа элшэеэ сасажа байһан нара тэмдэглэнэ гэһэн удхатай. Тиимэһээ залаа заабол улаан утаһаар хэгдэдэг», - гэжэ Дулма эгэшэ хөөрэнэ.
Дулма Лхамаевна 2000 оной эхин багаар Шулуутай нютагай Бальжит Батоевада хандажа, залаа томожо һураһан байна. «Тэрэ сагта Бальжит эгэшэ малгай оёдог байһан. Тиимэһээ оёһон малгайгаа хүсэд болгожо худалдахаяа залаа томодог бэлэй. Харин мүнөөнэй оёдолшод буряад малгайда наймааһаа бэлэн залаа худалдажа абадаг болонхой. Зүгөөр Шулуутайда залаа томодог хүнүүд байһан байха. Гадна Улаан-Үдын ямар нэгэн һургуулида залаа бүтээ-хые заадаг гэжэ дуулаа һэм», - гэжэ Дулма эгэшэ тэмдэглэнэ.
(Үргэлжэлэлынь 10-дахи дугаарта).
Оюна ШАГЖАЕВА.
