Ажалаар хүдэржэһэн
Мунко хүбүүн 1939 оной февралиин 28-да Баян-Булагай Гашуун гэжэ газарта һуури бодонгууд омогой Рабжаев Бымбыгыденэй ба Урда-Агын шарайд угай Балданай Долгорой 5 хүүгэдэй одхон боложо түрэһэн. Абань Эсэгэ ороноо хамгаалгын Агууехэ дайнда һураггүй үгы болоһон. Эжынь хүүгэдтэеэ Урда-Ага нютагаа бусаа һэн. Дайнай хатуу жэлнүүдтэ Мунко хүбүүн ажамидаралай дутагдалнуудые үзэжэ үндыгөө. Гуталайнгаа хахархада, бээлэйгээ хүлдөө углаад, саһан соогуур Жамбалай Дашидондок унаган нүхэртэеэ гүйжэ, наадажа ябаһан. Мүнөө Альбина нүхэрынь «тиигээд лэ бэень шанга бэзэ» гэжэ тэмдэглэнэ. Дайнай һүүлээрхи жэлнүүдтэ колхозой үбһэндэ үетэнтэеэ бухал шэрэдэг байһан. Эсэхэдээ, Дашидондок нүхэртэеэ бухалайнгаа хажууда унташаха ушарнууд дайралдадаг һэн ха.
Хүбүүн колхозой ажалда хүдэлһөөр хүдэржөө. 1954 ондо нютагайнгаа 7 жэлэй һургуули дүүргээд, һуралсалаа Агын 1-дэхи дунда һургуулида үргэлжэлүүлээ һэн. Һүүлээрнь сэрэгэй албанда 3 жэл ябаа. Сержант Бымбыгыденов эрхимээр алба гараһанай түлөө «Победа» часыгаар шагнагдаһан байна. Эрэ хүнэй уялга дүүргээд, Урда-Агадаа ашаанай машинын жолоошоноор 2 жэл хүдэлөөд, Буряадай гүрэнэй хүдөө ажахын дээдэ һургуулида ороо.
Эндэ малай аргашанай мэргэжэлдэ һуража ябаһан Альбина басагантай танилсаа бэлэй. Удангүй залуушуул 1964 ондо Улаан-Үдэдэ гэр бүлэ болоо.
Альбина 1940 ондо Шулуутай нютаг Хитад Арадай Республикаһаа ерэһэн Андрей Людофа ба Аргали нютагай Мункуева Жаргалдай хоёрой бүлэдэ 9 хүүгэдэй 7-дохинь боложо түрэһэн байна. «Эжыдэм адли» гэжэ олиггүй ехээр абадаа эрхэлүүлэгдэһэн басаган юм.
(Үргэлжэлэлынь 11-дэхи дугаарта).
Нордоп БАБУЕВА.
