Альганай шэнээн торгоор арбан захатые бүтээдэг, хурганай шэнээн торгоор хорин захатые бүтээдэг түбһэндэ түрэлхиин абьяастай уран гартан буряад арадта олон байхал. Тэдэнэй нэгэн Согто-Хангил нютагһаа гарбалтай Доржи Гомбоев болоно. Талаан бэлигынь модошо, түмэршэ дархан Шойжалсан абаһаань уг дамжан ерэһэн.
Хүнэй абьяас бэлиг ехэнхидээ эдир наһандань «мүндэлжэ», саашадаа хүгжэлтэ абахагүйнь олон ушар байдалһаа дулдыдадаг ааб даа. Энэ талаар Доржи хүбүүн аза талаантай байгаа гэжэ хэлэхээр. Табадахи ангиин байхадань, багшанарынь зураха бэлигыень анхаржа, ханын газетэ, һайндэрнүүдтэ һургуули шэмэглэлгэдэ хабаадуулдаг байһан. Тиигэһээр хүбүүн зураха шуналда абтаа бэлэй. Һургуулияа дүүргэһэнэй һүүлээр 2 жэл колхоздоо хүдэлхэдөө, шэмэглэлгын ажал үргэлжэлүүлээ. Буряад арадай поэт Цыденжап Жимбиев хүбүүнэй бэлиг обёоржо, Буряад Уласай Соёлой яаманһаа уран һайханай һургуулида орохо аргатай дансатай болгожо туһалһан ха. Тиигэжэ Доржи В.Серовой нэрэмжэтэ Ленинградай уран һайханай ба графическа училищида ороо. Оюутан хаһадаа ерээдүйдэ суута болоһон олон нүхэдтэй танилсаа. Тэдэнэй дунда нютаг хүбүүн, ерээдүйдэ РСФСР-эй арадай уран зурааша, Буряад Уласай Уран зураашадай холбооной түрүүлэгшэ Даши-Нима Дугаров дадаагүй холын томо хотодо үдэр бүриин шууяатай байдал, хүлгөөн соогуур Доржодо үнэн нүхэр, аха, түрэл мэтэ байһан.
(Үргэлжэлэлынь 13-дахи дугаарта).
Нордоп БАБУЕВА.
