Жэлэй дүрбэн сагта амарагшадаа үүдэеэ сэлин угтажа байдаг «Угсаахайда» гуша гаран жэл захиралаар Раднажаб Батуев хүдэлжэ байна. Тэрэ Новосибирскын электротехническэ институт дүүргээд, Дулдарга һуурин электригээр эльгээгдэhэн. Тэндэ дүрбэн жэл хүдэлөө, һүүлээрнь Зүдхэли нютагаа ерэжэ, колхоздоо электригээр, сантехнигээр ажаллаһан. Энэ хүнэй оролдолгоор «Угсаахай» hалбаржа, ганса нютаг нугадаа бэшэ, харин холо ойгуур суурхаһан. Раднажаб ахатай уулзажа, профилакториин ажабайдалаар hонирхоhон байнабди.
   - Раднажаб Цырендоржиевич, «Угсаахай» профилакториин байгуулагдаhан тухай хөөрэжэ үгыт.
   - Зүдхэли нютагай арад зон эртэ урда сагhаа хойшо аршаанай туhатайе һайн мэдэдэг байhан. Аршаанай дэргэдэ амарагшад майхан татажа түбхинөөд, зохёогдоhон хэдэн томо тогоон соо аршаан хэжэ, доронь гал түлижэ халаагаад, ваннада ородог байгаа.
   РСФСР-эй габьяата зоотехник, Агын Буряадай автономито тойрогой хүндэтэ эрхэтэн Норбо Доржиевич Доржиев зоной амархын тула ехэхэн оролдолго гаргажа, аршаанай дэргэдэ «Угсаахай» профилактори байгуулhан түүхэтэй.
   Амарагшад нэн түрүүн аршаанай гарадаг газарта ошожо зальбардаг, үргэдэг. Удаань хадын оройдо гаража, 2017 ондо рамнайлагдаһан «Жанчиб Шодон» субарга гороолжо, «Угсаахайн» эзэндэ хадагаа үргэжэ, үбшэнһөө аршалжа туhалхыень гуйдаг заншалтай.
   - Ямар барилганууд бии гээшэб?
   - Минии ерэхэдэ, гол корпусууд байгаа. Корпусуудые тойроод, хорин гурбан байрын гэр, ажахын складууд гэхэ мэтэ баригдаһан. Эдеэ хоолдо бага гаршатай байхын тула үмсэдөө мал барижа эхилээ hэмди. Дугар хүбүүмни фермер болоо, профилакторидоо жэлэй дүрбэн сагта мяхатай, һүтэй, өөхэ тоhотой байдагбди, хартаабха таридагбди. Иигэжэ закуп хэнэбди.
Хоёр дабхар байшан соо 4-5 хүнэй байха 20 таhалга бии. Тиихэдэ 4, 6 хүнэй байхаар кемпингнүүд, бани, душ байгаа ааб даа. Авто-унаагаа табиха гараж бии. Профилактори 170-аад хүниие багтааха аргатай.

You have no rights to post comments