- Ширап лама, «Толон» һониной уншагшадта өөр тухайгаа хөөрэжэ үгыт.
   - 1991 ондо Урда-Ага нютагта түрэһэн Жигдэн Ортонов болоноб, һахилаймни нэрэ – Ширап. Урда-Агын эхин шатын һургуулида һураад, Могойтын дунда һургуулида һуралсалаа үргэлжэлүүлһэнби. 2007 ондо 9-дэхи анги дүүргэһэнэй һүүлээр Сүүгэлэй дасанда хубараг болохо гэжэ шиидээб. Нэгэ жэл тэндэ һураад байтараа, 2008 ондо Ивалгын дасанда һуралсалаа үргэлжэлүүлхэеэ эльгээгдэһэн байнаб. Тэндэ 5 жэл һураад, эрдэмээ дээшэлүүлхэ зорилготой Энэдхэгэй Гоман дасан ошоо һэм. Тэндэ мүнөө болотор һуража дүүргэбэб. Габжын дамжаада шалгалта гарахаб. Ивалгын дасанда буряад ба ород хэлэнүүд дээрэ хэшээлнүүд болодог һаа, Гоман дасанда бүхы һуралсалнай түбэд хэлэн дээрэ үнгэргэгдэдэг. Түрүүн хэсүү байһаншье һаань, хэды һара соо ойлгодог болоо һэмди.
   - Дасанай шаби болохомни гэхэдэтнай, аба эжытнай юун гээ һэн бэ?
   - Анхан дасанда хубарагаар орохомни гэхэдэм, эжымни ехтэ гайхаа һэн. Би оройдоол 15 наһандаа ябааб. Тиихэдэ Алдар ламхай Сүүгэлэй дасанай шэрээтэ байгаа. Эжытэеэ хоюулаа шэрээтэдэ ороо һэмди. Шэрээтэ нэгэ һарын туршада дасанда байжа үзэхыемни саг үгөө һэн. Дасанда залуу хубарагууд байгаа. Тэдэнтэй нүхэсэһөөр, шэнэ байдалда дадаа һэм.
   - Гоман дасан тухай хөөрэжэ үгыт. Хэды һурагшадтайб?
   - Гоман дасанда 1-дэхиһээ эхилээд, 16-дахи анги хүрэтэр хубарагууд суртаал ном үзэдэг. Дүн хамта 1500-гаад оюутадтай. Һаянай Монгол оронһоо хүбүүд олоор ерэжэ һурадаг болонхой. 1-дэхиһээ эхилээд, 8-дахи һуралсалай хугасаада бүришье олон хүн һурадаг.
   Гоман дасанда 5-6 наһандаа ябаһан үхибүүдһээ эхилээд, һургуулида ябахада болохо. Тэрэнь ородоор хэлэбэл, «Монастырская школа» гэжэ нэрэтэй. Тэдэ 1-дэхиһээ 8-дахи анги хүрэтэр һураад, дээдэ һургуулиин шаби болодог. Һургуулида үхибүүд суртаал ном сээжэлдэдэг, дагсал хаялсажа һурадаг, хажуугаарнь юрын һургуулиин программаар хэшээлнүүд ябуулагдадаг. Тиигэжэ тэдэ тоо бодолгодо бэрхэ болодог, англи хэлэ шудалдаг, ондоо хэшээлнүүдшье олон юм. Мүнөө бага наһанай үхибүүдэй тоо 200-гаад болодог. Эдэниие хаража байха харюусалгата лама табигдадаг. Тиимэ хүниие түбэдөөр «Жигдэнген» гээд хэлэдэг.
   Дээдэ һургуулида захирал гэжэ байдаггүй. Захиралай орондо түбэдөөр «Гарам Жорвон» гэжэ нэрэтэй староста бии. Энэ тушаалда һаарамбын һургуули хэжэ ябаһан ламанар һунгагдадаг. Тэндэмнай бүхы тушаалнууд һунгалтын аргаар эмхидхэгдэдэг. Жэшээлбэл, шэрээтэ ба унзад 6 жэлээр тушаал баридаг, гэсхы 1 жэлээр һунгагдадаг.

You have no rights to post comments