- Владимир Цыдендоржиевич, «Толон» һониной уншагшадта Ага найман эсэгын обоо тухай хөөрөөд үгыт. Хэнэй үүсхэлээр субарга бодхоогдоһон бэ?
   - 1987 онһоо 1992 он болотор Жигмитов Золто ламхай Агын дасанай шэрээтэ байһан. Би ламхайтай түрэл болодогби, тиигээдшье дундаа хани барисаатай байһамди. Багсаахада, 1991 он байгаа гээшэ гү даа. Улаан Залаата гэжэ газарта Ага найман эсэгын обоо байһан. Тэрэ газарта субарга бариха байгаа» гэжэ Золто ламхай нэгэтэ намда хэлээ агша һэн. Хэдэн жэл үнгэрөөд байхада, хэлэһэн үгэнүүдынь мүнөөшье болотор һанагдадаг. Сэдьхэлдэм бүхөөр хадуугдаа болоно. Ага найман эсэгын обоодо субарга бодхоохо тухай юундэ намда хэлэһэн байгаа гээшэб гэжэ заримандаа һанагшаб. Улаан Залаата газар ламхайтай хэды ябажа харадаг, хөөрэлдэдэг һэмди. Тэрэ сагта Агын Буряадай автономито тойрогой Захиргаанай Толгойлогшоор Гуродарма Цэдашиев хүдэлжэ байгаа. Гуродарма Цэдашиевичтай обоогой газар ошожо хараа бэлэйбди.
   2007 оной үеэр Намнанай багшын тоонтодо субарга баригдажа эхилээ. Тэндэ Агымнай урагшаа һанаатай бэрхэ хүбүүд: Баир Сухобаторов, Базаржаб Батомункин, Батор Чимитдоржин гэхэ мэтэ субаргын ажалда хам оролсоһон юм. «Намнанай багшада субарга бодхоожо байнабди» гэжэ тэдэнэй нэгэтэ хэлэхэдэ: «Улаан Залаатада Ага найман эсэгын обоо байһан. Тэрэ обоогоо һэргээжэ, субарга бодхоохо ажал баһал байна» гэжэ дуугараа һэм. Тэрэнэй һүүлээр Базаржаб Батомункинтай субарга бариха асуудалаар хэды уулзаа бэлэйбди. Энэл жэлэй намарынь Баир Баясхаланович Жамсуев Агын Буряадай тойрогой Захиргаанай Толгойлогшоор хүдэлжэ байһанаа, тушаалаа тушаажа байгаа. Тэрэ үедэнь Баир Баясхалановичтай уулзажа, обоодо субарга бодхоохо тухай хөөрэлдөө эмхидхээб. Баир Баясхаланович энээниием ехэтэ дэмжээд: «Субаргын барилгада өөрөө хабаадахаб», - гэжэ хэлээ һэн.

You have no rights to post comments