Пионернүүдэй лагерь, “Зарница” болон түүдэг – иимэл сог залитай хэмжээ ябуулганууд, урмашалга мүнѳѳнэй үхибүүдтэ тон ехээр дуталдадаг гэжэ һанахаар. Мүнѳѳ улаан галстук олдохошьегүй, хоморой зүйл болоһон байха, “пионер” гэһэн үгэшье мартагдантаа. Зүгѳѳр пионернүүдэй һайндэр литэдэүлэнхэй.
Манай гүрэндэ пионернүүдэй хүдэлѳѳн 1960-1990 онуудта ехэ хүгжэнги байгаа. Мүнѳѳшье агынхид мэдээжэ пионервожатануудые: Будаханда Жигмитовна Цырендоржиевае (АСШ№1), Будаханда Жамбаловна Аюровае (Урда-Ага), Валентина Очировна Ивановае (Ага), Дугбэма Жигмитовна Чимитовае (Ага), Цыцык Жаповна Дашинорбоевае (Согто-Хангил), Намжилма Санжимитуповае (Шандали) г.м. дурсан дурсан байдаг гээшэ.
Агын аймаг дотор мэдээжэ байһан пионервожата Цыцык Жаповна (энэ обогынь албан ёһоной саарһаараа, харин нютаг зонойнгоо дунда Цыцык Базаржаповна гээд мэдээжэ) Согто-Хангилһаа гадна Тугшанда, Хойто-Агада бүхыдѳѳ 13 жэлэй туршада пионернүүдые хүмүүжүүлэгшээр хүдэлһэн намтартай. Тэрэ Согто-Хангилда 1951 ондо түрэһэн байна. 1975 ондо Агын багшанарай училищи “хореограф” мэргэжэлтэйгээр дүүргээд, наһаараал хатарай кружок ябуулһан юм. Согто-Хангилайнгаа хүгжэмэй һургуулида хатарай бүлэг ударидажа, аша үрэтэй ажал ябуулһанайнь гэршэ - энэ бүлэгынь 1984 ондо “арадай” нэрэ зэргэтэй болоһон суутай.
- Пионернүүдэй үе сагта бүхы ажаябуулгамнай таба-табан жэлээр түсэблэгдэдэг байһан. Табан жэлэй туршада түсэблэгдэһэн хэмжээ ябуулганууд: хэрэггүй болоһон саарһа суглуулгын “Миллион - Родине” гэһэн мүрысѳѳн, газопровод таталгада түмэрэй дуталдахада эмхидхэгдэһэн “Операция “Уренгой”, патриотическа хүмүүжүүлгын “Мы – верная смена твоя, комсомол”, “Юные друзья милиции”, “Тимуровская команда”, “Школа мужества” г.м. үнгэргэгдэдэг бэлэй”, - гэжэ Цыцык Жаповна хѳѳрэнэ.
Дэлгэрэнгыгээр 20-дохи дугаарта.
