Шанга бүхэшүүлые дала дээрэнь хэбтүүлһэн
   Зүдхэли нютагһаа уг гарбалтай, дүрэ буляалдаата барилдаагаар СССР-эй тамирай мастер Аюр Цырендоржиев бүхэ ба дүрэ буляалдаата барилдаануудай хүгжэлтэдэ горитойхон хубита оруулһан юм. Аюр аха үнгэрэгшэ зуун жэлэй дала, ная гаран онуудта Буряад Уласай «алтан можын» гэшүүн ябаһан. Барилдаанай хибэс дээрэ өөрынгөө нюуса «һамган дэгээ» дүрөөр олон бүхэшүүлэй нюрга шоройдуулһан байха. Советскэ Союзай Баатар Базар Ринчиногой дурасхаалай шанда хүртэхын түлөө мүрысөөндэ Зүдхэли нютагай барилдаашад эгээ түрүүшынхеэ дамжуулгын кубогта хүртэһэн. Тиихэдэ 17-тойхон Аюр Цырендоржиев өөрын шэгнүүртэ илаһан. Тэрэ сагһаа хойшо Зүдхэли нютагай можо 12 дахин Базар Ринчиногой мүрысөөндэ оройлһон габьяатай. Аюр Цырендоржиев тэрэ габьяадань ехэхэн нэмэри оруулһан юм. 1972 ондо Зүдхэлиин дунда һургуули дүүргэжэ, наһанайнь удаадахи шата эхилээ. 1970-аад онууд Аюр Батуевичай барилдаашанай харгыда үрэ дүнтэй байһан. Советскэ Союзай мэдээжэ олон бүхэшүүлые дала дээрэнь хэбтүүлээ, одоол сахилгаан түргэн дүрэ гохонуудаа харуулдагынь тэрэ үеын барилдаашадта мэдээжэ.
Тамирай ветеран иигэжэ дурсана: «1977 оной июнь һарада Буряад АССР-эй байгуулагдаһаар 25 жэлэй ойн нэрэмжэтэ стадион дээрэ РСФСР-эй мүрысөөн үнгэргэгдөө һэн. Тэндэ Буряад Уласай суглуулагдамал можо 2-дохи һуури эзэлһэн. Олег Алексеев Геннадий Манжуев хоёр алтан медальнуудта хүртөө. Би, Бато Дашинамжилов, Гармажап Цыренов, Вячеслав Мархаев болон Илья Гармаев гэгшэд мүнгэн медальнуудаар шагнагдаһан. Би, тиихэдэ СССР-эй абарга, дэлхэйн кубогта хүртэһэн Виталий Токченаковые диилэһэндээ ехээр баярлаа һэм. Түгэсхэлэй шатада Европын абарга Анатолий Белоглазовтай барилдаад, өөрын «һамган дэгээ» дүрэ хэрэглэжэ, нюрган дээрэнь унагаагаад, һайса барижа шадаагүйб, тэрэ дүй дүршэлтэй, намһаа хүсэтэй байһандаа мултаран гараа. Теэд тэрэнэй мэдээжэ «мельницэдэ» ороод диилдээб.

You have no rights to post comments