Ага тосхоной Жамьян Балданжабоной үйлсын 50 жэлэй баяр ёһолол майн 21-дэ тэмдэглэгдэхэнь.
Манай аба - Эсэгэ ороноо хамгаалгын дайнда хабаадагша Тогон Болотов дайнай һүүлээр Сагаан-Уула нютагһаа Агын сэлеэн зѳѳжэ ерэхэдээ, Подгорная үйлсѳѳр ѳѳрѳѳ гэр барижа ороһон. Тэрэ үйлсэнь 1967 ондо Ж.Балданжабоной нэрэмжэтэ болоо. Үйлсынгѳѳ 50 жэлэй ой угтуулан, аба эжыгээ дурсанаб. Абамнай 1918 ондо Сангажабай Болот ба Батын Димит хоёрой гэр бүлэдэ түрэһэн. Тоонтонь - Хан Уулын бооридо Жараанай нуурһаа, Намнанай багшын субаргаһаа холо бэшэ. Зугаалайн 7 классай һургуули, удаань Улаан-Үдэдэ бухгалтерай һургуули дүүргэжэ, Сагаан - Уулынгаа “Путь Ильича” колхоздо счетовод-бухгалтераар, саашадаа элдэб ажалнуудта хүдэлһэн. 1941 оной сентябриин 15-да Эсэгын дайнда мордоо.
Т.Болотов (зүүн гарһаа) эжытэеэ, гэр бүлэтэеэ.
Ѳѳрын гараар 1949 ондо бодхооһон 26-дахи дугаар гэрынь мүнѳѳшье болотор Ж.Балданжабоной үйлсэдэ тобхойходожо зогсоно. Тэрэ сагта ордон шэнги һайхан гэр бүтэһэн даа гэжэ манай эжы хѳѳрэгшэ бэлэй. Гэрэйнь үүдэн үйлсэ руу хараһан, хэрэлсы, верандань гайхама гоёор һиилээтэй, хожомынь тоһон шэрээр шэрдэгдэһэн байгаа. Тэрэ сагтаа зоной һонирхохоор, гоёшоохоор лэ гэр байһан ха. Теэд хүүгэдэйнгээ олон болоходо, тэрэ гоё хэрэлсы, верандаяа задалжа, абамнай ѳѳрѳѳ гэрээ зүүн тээшэнь залгаһан ха даа. Гартаа аргагүй дүйтэй, уран гартай абамнай эд бараагаа: буфет, ханзануудые, амһартын шкаф, стол, стулнуудые, комод, радиолын тумбочка ѳѳрѳѳ дархалаа. Тумбочкань хоёр хажууһаа шэл ханатай, алталмал гоё шэрээр ажурна зураг зураатай һэн. Сэсэгүүдые табиха табюур, телефонной тумбочка, крантай умывальник, трюмо – уран һайханай бүтээлнүүд мэтэ бэлэй. Тэрэ томо, үндэр гэгшын трюмогой дээдэ захадань модоор һиилэжэ хэһэн сэсэг, набша намаа байдаг һэн. Балданжабоной үйлсэдэ байдаг тэрэ үеын бүхы басагад вечерэй болоходо, зорюута ерэжэ, толгойһоо эхилээд, хүл хүрэтэрѳѳ урагша хойшоо эрьелдэн, ѳѳрыгѳѳ гэрэлдэ харадаг байгаал даа. Үшѳѳ бурханай гунгарбаа дархалһан. Хүгшэн эжын наһа барахада, эжымнай тэрэ гунгарбааень бурхантайнь дасанда үргѳѳ агша һэн. Юундэб гэхэдэ, тэрэ сагаар бурханда ехэ мүргэдэггүй, шүтэдэггүй, хорюултайшаг байһан. Абамнай Агынгаа дасанда Майдариин хуралай үедэ гаргагдадаг Ногоон мориной хоёр тэргыень (моринһоо бэшыень) бүтээһэн.
Дэлгэрэнгыгээр 20-дохи дугаарта.
