Эдэбхитэй залуу бүлэ
   Боохой хуасай омогой Ламажабай Александрай Буладай ба Аргали нютагһаа гарбалтай улаалзай хүбдүүд омогой Галсанай Базаржабай Марина басаганай бүлэ үри хүүгэдтэеэ угайнгаа туг – түүхын таһаршагүй холбоонуудаймнай тэмдэг гэжэ тайзан дээрэ омогорхолтойгоор үргэн, сугларагшадые амаршалжа зогсоо бэлэй.
   2008 ондо айл болоһон залуу бүлэ дүрбэн хүүгэдые – хоёр хүбүүдые, хоёр басагадые хүмүүжүүлнэ.
   «Бидэ сэсэн, мэргэн, баатар хоёр хүбүүдтэйбди, дангина һайхан басагадтайбди. Хүбүүд абадаа адли тамирта дуратай, хүсэ шадалаа туршаха эрмэлзэлтэй – һур харбаха, шагай наадаха, һээр шааха дуратай», - гэжэ Марина эжынь танилсуулаа.
   «Манай басагад эжыгээ һажаажа, гоё һайхан нарин мэдэрэлтэй. Дуу дуулаха, хатарха, шүлэг хэлэхэ шадабаритай», - гэжэ Булат абань хөөрэбэ.
   Тэдэ хоёр хүбүүдтэеэ, хоёр басагадтаяа, Жаргалма абгайнгаа Долгор басагантай мүнөө үеын хатар харуулжа, халуун альга ташалгада хүртөө һэн. Заншалта хубсаһа һажаалгажа оёһон мүнөө үеын буряад хубсаһа бултандаа оюулһан байна.
   Гэрэй эзэн Булат айлай 5 хүүгэдэй одхон болоно. Һүдэнтын дунда һургуулида 15 жэл физкультурын ба ОБЖ-гэй багшаар хүдэлһэн, мүнөө нютагтаа хоёрдохи жэлээ түймэр саралгын частиин даргын орлогшоор хүдэлжэ байна. Гэрэй эзэн эхэнэр Марина «Ургы» хүүгэдэй сэсэрлигтэ ахалагша хүмүүжүүлэгшэ юм, 16-дахи жэлээ хүдэлнэ.
   Нёдондо «Хорхогой» нааданай урда үдэр Ламожаповтанай бүлэ V «Бабжын нааданда» үндэһэн хубсаһанай янзада 2-дохи һуури эзэлээ һэн. Тайзан дээрэ 73 наһатай Бальжирова Долгоржаб эжынгээ уранаар оёһон дэгэлнүүдтэй гараһан байна. Эжынь аша зээнэрэйнгээ жэлтэй болохоһоонь эхилээд, дэгэлнүүдые оёжо үмдэхүүлдэг юм. Марина Базаржаповнагай хэлэһээр, хүүгэдынь хүгшэн эжынгээ оёһон хубсаһа үм-дөөд, элдэб мүрысөөнүүдтэ амжалтатай хабаадажа ябадаг.
   Урагшаа һанаатай, эдэбхитэй, урма зоригтой залуу гэртэхин нэгэн дуугаар «Хорхогой» нааданда хабаадаха гэжэ шиидээ һэн. Тэдэ нютагайнгаа нэрэ хүндэ хамгаалхаһаа гадна хүүгэдтээ уран һайханиие мэдэрхэ арга үгэнэ, тэдэнээ хүгжөөнэ, зоригжуулна, хүн зоной урда гаража, үгэшье хэлэхэнь ехэ ха юм. Декабрь һарада Агын Буряадай тойрогто Буряад хэлэнэй фестивалиин хэмжээндэ үнгэргэгдэһэн «Арадайм заршам – код предков» гэһэн мүрысөөндэ Булат Ламожаповтанай бүлэ баһал эдэбхитэй хабаадаһан байна.
   Марина Базаржаповна иигэжэ хэлэнэ: «Хүнэй дурадхахада, гэдэргээ таталдангүй, гэр бүлөөрөө арга шадалаараа оролдожо, мүрысөөнүүдтэ хабаададагбди».
   Ламожаповтанай бүлэ ажалша бэрхэ, хүдэр байра байдалтай. Үхэр мал, хони, гахай, тахяа баридаг. Хартаабха, огородой хоол элбэгээр ургуулжа, баян нөөсэтэй үбэлжэдэг. Гэртэхиниинь хүүгэдээ багаһаань ажалда дүршүүлжэ, газаахи, гэртэхи ажалаа сугтаа хэдэг юм. Хоёр хүбүүд үнинэй абатаяа үбһэеэ абадаг. Басагад – эжын туһалагшад.

You have no rights to post comments