Манай «Ромашка» сэсэрлигтэ буряад хэлэ хүгжөөлгын ажал тусхай программаар ябуулагдадаг. Энэ программамнай Д.Д.Могоевагай «Буряад хэлэнэй программа», тиихэдэ Агын буряад хэлэнэй багшанарай суглуулhан методическа пособинуудай үндэhэн дээрэ зохёогдоhон юм.

 

Үхибүүдые мүрысѳѳнэй бэлэдхэлдэ гэртэхинэй үүргэ ехэ.

 

2017-2018 оной hуралсалай жэлдэ hургуулиин хоёр ахалагша ба хоёр бэлэдхэлэй бүлэгүүдэй үхибүүд тус программаар үзэхэ бшуу. Жэлэй туршада хүүгэд буряад хэлэнэй хэшээлдэ ябажа, түрэл арадайнгаа ёhо заншал ба байра байдал тухай шэнэ юумэнүүдые мэдэдэг болоно, тооложо hурана, буряад арадай онтохонуудые уншана, элдэб тоолуурнуудые сээжэлдэнэ.

Сентябрь hарада Агын тойрогой 80 жэлэй ойн баярай хэмжээндэ түсэблэгдэһэн ажалнууд булта ябуулагдаа. Ахалагша ба hургуулида бэлэдхэлэй бүлэгүүдэй үхибүүдтэй Агын тойрогой түүхэ, Ага тосхон тухай хөөрэлдөөн үнгэргэгдөө. Мүнөөнэй шэнэ технологинуудай аргаар хүүгэд сэсэрлигhээ гарангүй, нютагайнгаа түүхэтэ ба байгаалиин хүшөөнүүдтэй танилсана. Бага бүлгэмэй үхибүүд «Хун шубуун», «Балжан хатан» гэһэн домогуудые харана бшуу.

Октябриин 9-hөө сэсэрлигтэмнай буряад хэлэнэй hара эхилээ. Манай хүмүүжүүлэгшэ Арьян Сандаков тойрогой Буряад хэлэнэй hарын нээлгэдэ шүлэг хөөрэжэ хабаадаад, баярай бэшэгээр шагнагдаhан байна.

Буряад хэлэнэй hарын туршада арадай аман зохёолдо ехэ анхарал хандуулагдаха юм. Бүхы үхибүүдэй хоорондо «Барбаадай» гэһэн шүлэгэй конкурс үнгэргэгдөө. Тэндэ арбан табан басагад, хүбүүд шүлэгүүдые уранаар уншажа, жюриин гэшүүдэй шэхыень хужарлуулhан байна. Бүхы үхибүүд грамота ба «Бишыхан уран зурааша» гэжэ шэрдэлгын дэбтэрнүүдээр шагнагдаа. Түрүү hуури эзэлhэн Дарина Бабужапова, Аюша Очиров, Сэсэг Ринчинова гурбан муниципальна шатын «Барбаадай» гэһэн мүрысөөндэ хабаадажа, Дарина – хоёрдохи, Сэсэг гурбадахи hуурида гараа, Аюша хүбүүмнай «Уран наадагша» гэжэ номинацида илаһан байна. Шанда хүртэhэн басагаднай тойрогой мүрысөөндэ хабаадаха. Тус мүрысөөнэй бэлэдхэлдэ гэртэхин ехэ туhа хүргөө юм. Мүнөө гэртэхинэй дунда «Буряад арадай наадан» гэhэн сэдэбээр гараар хэһэн бүтээлнүүдэй мүрысөөн соносхогдоо. Хүүгэдэй аба эжынэр эдэбхитэйгээр хабаадаха гэжэ hанагдана.

Заншалта болоhон «Һалбарыш, буряад хэлэн!» гэhэн һайндэрөөр буряад хэлэнэй hара түгэсхэхэ түсэб табигдаа. Гэртэхин буряад хэлээрээ hонирходог боложол байна. Түрэл хэлэеэ, ёhо заншалаа мэдэхэ гээшэмнай бидэндэ, буряад зондо, ехэ шухала болоно ха юм.

 

Дэлгэрэнгыгээр 42-дохи дугаарта.

You have no rights to post comments