Гомбожаб Цыбиковэй нэрэмжэтэ Агын үндэhэтэнэй музей cоо ноябриин 8-да «Магтанабди алдарта уг гарбалаа» гэhэн заншалта үзэсхэлэн нээгдэhэн байна.
Ц.Жамсаранов басагантаяа ба зээ хүбүүнтэеэ.
Агын «Түмэн жаргалан» аман зохёолой бүлгэмэй гэшүүн, Согто-Хангилай Yбжэгэеэ гэжэ газарта түрэhэн сагаангууд угай, 82 наhатай Санданов Дамбадугар аха «Сэлгеэхэн нютагни» гэhэн арадай дуу гүйсэдхэжэ, удхатай энэ хэмжээ ябуулгын баяр ёhолол эхилээ hэн. Урда тээнь эндэ жэлэй туршада Ага най- ман эсэгэ болохо галзууд, хуасай, хүбдүүд, шарайд, харгана, бодонгууд, хальбан угайхидтай танилсуулга болоhон байгаа. Энэ удаа сагаангууд угайхидай суглархада, сэнхир дэлгэсээр дэлхэйн мэдээжэ дуушан, СССР-эй арадай артист Лхасаран Линховоиной «Yншэн сагаан ботогон» дуун зэдэлээ, Россиин Федерациин габьяата артист Цыден Цырендоржиевай «Первый нукер Чингисхана» гэhэн кинодо наадаhан хэhэг ба СССР-эй арадай депутат, тойрогой, аймагай хүдөө ажахые ударидаhан Цырен Нимбуев тухай богонихон фильм харуулагдаа, Москва хотодо ажаhуудаг Эсэгын дайнай ветеран, 94 наhатай Дашинима Шагдароной дайнда суг ябаhан нүхэд тухайгаа хөөрэhэн дурсалгань шагнагдаа hэн. Мүн хори буряадай ударидагшадай нэгэн, сагаангуудай зайhан байhан Мухуу Унаганов, багша Буда Рабданов, монгол зурхай зохёоhон Лубсан Бальжир габжа лама, Агын түрүүшын эмшэн Лыксок Жабэ, зүүн зүгые шэнжэлэгшэ, профессор Базар Барадин, партиин ба ниитэ ажаябуулагша Батоцырен Догдомэ, Эсэгын дайнай 3 шатын орденгуудай дүүрэн кавалер, дайнай газарта унаhан эрэлхэг сэрэгшэ Нимбу Ламажапов, байлдаанда дайсанай 7 самолёт буудажа унагааhан, Дайшалхы Улаан Тугай орденой кавалер Даба Гарбуев, 30 жэлэй туршада сэрэгэй албанда ябаhан, полковник зиндаатай Балданжамсо Батоцыренов, Дээдын Зүблэлэй депутат, тойрогто hургуулинуудай дэргэдэ интернат байгуулагша Чимитдоржи Дагбаин, нютаг ороноо шэнжэлэгшэ, багша, Россиин Федерациин соёлой габьяата хүдэлмэрилэгшэ Жигжитжаб Доржиев, Россиин арадай артистка, Буряадай гүрэнэй оперо ба баледэй театрай оперын уран hайханай хүтэлбэрилэгшэ Дарима Линховоин ба бэшэнэй алдар нэрэ, намтар хүтэлэн ябуулагша Шойжит Арсаланова дулаанаар дурсаа бшуу. Агын Буряадай тойрогой Захиргаанай хүтэлбэрилэгшын орлогшо Билигма Будаева, хизаарай музейн директор Рыгзын Цыдендоржиев гэгшэд сугларагшадые хани халуунаар амаршалаа.
Наhан соогоо олондо туhатай ажал хэжэ, аша габьяа харуулhан сагаангууд угай түлөөлэгшэд үгэ абажа, hанамжануудаараа хубаалдаа. Тиихэдээ юундэ хүн уг гарбалаа hайн мэдэхэ ёhотойб гэhэн шухала хөөрэлдөөн болоо. Россиин Федерациин соёлой габьяата хүдэлмэрилэгшэ, ажалай ветеран Дондог Дашиянжипов иигэжэ эли тодоор хэлэhэн байна: «Хори буряадууд хоёр мянган жэлэй хугасаа соо эб нэгэтэй ябана. Yсөөхэншье hаа, иимэ удаан болзорто сугтаа ябаhан бэшэ арад үгы гэжэ тоологдодог. Юундэ hайн шанараа алдангүй ябанабибди гэхэдэ, уг гарбалаа, аха захаяа ходо тулгажа, үгыень дуулажа, hургаал заабаритай байhандаа хори буряадууд бэе махабад, сэдьхэл һанаа һайтай, шанга, шадалтай ябана. Хоёрдохёор, юундэ уг унги, угай бэшэг хэрэгтэй байгааб гэхэдэ, түрэл гарал зон долоон үеhөө нааша ниилэжэ, шуhаяа холижо, гэр бүлэ боложо байгаагүй. Тиимэhээ мүнөө айл бүхэн угайнгаа бэшэг үргэлжэлүүлжэ, залуушуулдаа дамжуулая. Хүн шанарайнгаа 80 хуби эхэhээ абадаг гэhэн баримта байха. Угай бэшэг соо нагасанар талаяа оруулха хэрэгтэй гэжэ һананаб.
Дэлгэрэнгыгээр 46-дахи дугаарта
