Ага тосхоной шүдэ аргалдаг клиникэ руу ороходо, багашуулай шаг шууяан дуулдана.
В.Батомункуева (зогсоно).
Мэнэ һая шүдэеэ аргалуулhан үхибүүд хэнһээшье баяртайнууд, үбшэеэ мартанхайнууд, коридороор гүйлдэнэ. Тиихэдэнь зарим үхибүүд гэртэхинтэеэ аргашанда орохо ээлжээгээ хүлеэжэ байгаа һэн. Үүдэ татажа ороходо, стоматолог Валентина Батомункуева эдир эрхэтэдэй шүдэ аргалжа байгаа. Сүлөөгүй ажалайнь хоорондо забһар оложо, ажалайнь баян намтартай танилсажа, хөөрэлдөө үнгэргэһэн байнабди.
Уулзалгын гол шалтагаан гэхэдэ, Валентина Батомункуева байгша ондо хизаарай эрхим эмшэдэй тоодо орожо, ажалай талаар үндэр амжалта туйлаһан байгаа. «Хизаарай эрхим эмшэн» гэһэн конкурс 2-дохи жэлээ эмхидхэгдээ. Забайкалиин эмнэлгын 32 эмхиһээ 100 гаран хүн конкурсдо хабаадажа, тэдээнэй 25-иинь 8 янзада эрхимүүд болоһон байна. Валентина Юрьевна хизаарай энхэ элүүрые хамгаалгын министрэй «За верность профессии» гэһэн гран-прида хүртэһэн байха юм. Тойрогой больницын стоматологиин таһагта хүүгэдые угтан абадаг эмшэн Валентина Батомункуева «Лучший врач стоматологического профиля» янзада түрүүлжэ, дипломдо ба грегүүдэй энхэ элүүрэй Гигиея бурханай дүрсэтэй бэлэгтэ хүртэһэн байна.
Валентина Юрьевнагай стоматологой ажалда бэеэ зорюулһаарнь, 30 жэл боложо байна. Тэрэ 1965 ондо Агын аймагай Шулуутай нютагта түрэһэн юм. «Галина Жигжитжаповна Доржиева эжымнай энэрхы сэдьхэлтэй, бэрхэ эмшэн ябаһан. Шулуутайда, Хилын совхоздо фельдшерско-акушерскэ пунктые даагшаар ажаллаһан. Эжын һайхан үреэлээр эмшэн болоо һэм. Ажабайдалай дүй дүршэл олгуулжа, зүб тээшэнь хододоо шэглүүлжэ ябаһан юм», - гэжэ В.Батомункуева эжы тухайгаа дурсан хөөрэнэ.
Дэлгэрэнгыгээр 50-дахи дугаарта
