Улаан-Yдэ хотодо ажаhуудаг Агын тойрогhоо уг гарбалтай зоной байгуулhан «Агинское землячество» гэhэн ниитэ бүлгэм мүнөө намар шэнэ түрүүлэгшэтэй болоһон байна: Агын аймагай Һүдэнтэ нютагhаа уг гарбалтай залуу эдэбхитэн Баясхалан Раднагуруев hунгагдаа. Тэрэ урагшаа hанаатай, эрмэлзэл ехэтэй мэргэжэлтэн юм. Бүлгэмэй түрүүлэгшын Ага нютагаа ерэхэдэнь уулзажа, хэдэн асуудалтайгаар хандаһан байнабди.
- Баясхалан Занданович, нэн түрүүн, уншагшадтамнай намтараа хөөрэжэ үгыт даа.
- Һүдэнтэ нютагта Зандан ба Цырен-Ханда Раднагуруевтанай гэр бүлэдэ 1986 ондо түрэһэн байнаб. Дүрбэн хүүгэдэй гурбадахинь болоноб. Һургуулияа дүүргээд, 2008 ондо Москва хотодо Россиин гүрэнэй университедэй тамирай багшын һургуули дүүргэһэн байнаб. Улаан-Үдэ ерэжэ, хотын 32-дохи hургуулида тамирай багшаар ажалда орожо, ажалайнгаа намтар эхилээ hэм. Удаань хотын 9-дэхи hургуулида дүрэ буляалдаата барилдаанай һоригшоор хүдэлөөб. Сэрэгэй албанда татагдажа, Омскдо десантна-штурмовой дивизиин тагнуулай ротодо уялгаяа дүүргээ hэм. Армиин һүүлээр Улаан-Үдэ хото бусажа, Буряад ороной үндэһэтэнэй 1-дэхи лицей-интернадта мүнөө болотор багшаар ажалланаб. Үхибүүдтэ тамирай, ОБЖ-гэй, технологиин хэшээлнүүдые заанаб. Ажалай хажуугаар Сибириин техническэ университедэй «Менеджмент образовательной организации» гэһэн шэглэлээр 2-дохи дээдэ мэргэжэл шудалһан байнаб. Багаhаа тамирта дуратайб. Оюутан ябахадаа, дүрэ буляалдаата барилдаагаар Москва хотын шангай мүрысөөндэ хүлэр медальда хүртөө һэм. Сэрэгэй алба хаажа ябахадаа, дивизиин шангай түлөө самбын мүрысөөнүүдтэ хабаадажа, мүнгэн ба хүлэр медальнуудта хүртэһэн байнаб. Мүнөөшье сүлөө сагтаа һорилгын зал руу ябажа, бэе махабадаа хүдэржүүлдэгби. Эрдэм һуралсалай һалбарида хүдэлжэ, грамота, шагналнуудта хүртэһэн байнаб. Жэшээлбэл, Буряад ороной Эрдэм һуралсалай министерствын Хүндэлэлэй грамотада, баярай бэшэгүүдтэ хүртэһэн, «Учитель года-2013» гэhэн Буряад ороной конкурсын «Надежда Бурятии» янзада илагша болоһон байнаб. Нүхэртэйб, хоёр хүүгэдтэйб. Нүхэрни - Арюна Раднагуруева, биологиин эрдэмүүдэй кандидат. «Агинское землячество» эмхиин түрүүлэгшэ болохынгоо урда тээ хото дээрэ ажаһуудаг hүдэнтынхидэйнгөө бүлгэмэй ударидагша ябааб.
- «Агинское землячество» эмхи ямар зорилгонуудые бэелүүлхэ үүргэтэйб, хото дээрэ тойрогһоо гараһан зон олон ажаһуудаг гү?
- Улаан-Үдэдэ ажаһуудаг Ага нютагайхидаа дэмжэхэ, ниитэ, соёлой, тамирай ба бусад хэмжээ ябуулгануудта эдэбхитэйгээр хабаадуулха, бэе бэетэйнь танилсуулха г.м. зорилгонуудые бэелүүлхэ үүргэтэйбди. Хото дээрэ ажаһуудаг агынхид нэгэдэжэ, бэе бэедээ туһатай, дүнгэжэ ябаха ёhотой бшуу. Буряад орондо ажаһуудаг зонойнгоо түрэл тойрогтоёо холбоо харилсаагаа алдахагүйн тула, нютагаа һанажа, дээгүүр нэрлүүлжэ ябахынь тула ажал ябуулха уялгатайбди. Буряад ороной ниислэл хото дээрэ Агын тойрогой нютаг бүхэнһөө гараһан зон ажаһуудаг. Һургуулиин һурагшад, оюутад, ажал хэдэг, наһанайнгаа амаралтада гараһан зон гээд тоолоходо, угаа олон юм. Нютагайхидайнгаа бүхы зоной тоо бүридхэхэ ажал ябуулжа эхилээбди. Һүүлэй үедэ Агын тойрогһоо гэр бүлөөрөө, наһанайнгаа амаралтада гаража, үри хүүгэдэйнгээ хажууда ажаһуухаяа олон хүн ерэнэ. Хараад үзэбэл, эмнэлгын, һуралсалай, социальна хангалгын ба бусад газарнуудаар нютагаймнай олон хүн ажалладаг гээшэ. Жэшээлхэдэ, Зүдхэли нютагһаа 200 гаран хүн хото дээрэ ажаһууна. Нэгэ нютагай зон аад, нэгэл газарта ажаһууһанаа, хаягуудаа мэдэхэгүй ушарнууд һайса болодог.
Дэлгэрэнгыгээр 50-дахи дугаарта
