Байгша оной ноябрь һарада бидэ Агын һуралсалай эмхинүүдтэ һурадаг монгол оюутадтай танилсажа, һуралсалаарнь, ажабайдалаарнь һонирхоһон байнабди.
"WorldSkills" конкурсын түгэсхэлэй үедэ.
Ага тосхондо Монголой Хэнтэй, Сүхэбаатар, Дорнод, Хүбсэгэл аймагуудай, Улаан-Баатар хотын хүбүүд, басагад - хамта 25 оюутад һурана: Агын багшанарай колледждо – 17, Агын эмнэлгын колледждо – 8 хүн. Түрүүшын жэл булта ород хэлэ үзөөд, һүүлээрнь шэлэһэн мэргэжэлээрээ һуралсалаа үргэлжэлүүлнэ, зариманиинь хүгжэмэй, физкультурын, эхин шатын ангинуудай багшанар, хүүгэдэй сэсэрлигэй хүмүүжүүлэгшэд болохо. Дүрбэниинь нэгэ жэлэй туршада ород хэлэ шудална, ород хэлэнэй шалгалта гараад, саашаа Агын эмнэлгын колледждо һураха. Монгол оюутад ород хэлэ үзэһэнэй үнэмшэлгэтэй болоходоо, манай гүрэнэй алишье дээдэ һургуулида орохо аргатай болодог. Хоёр басагад Шэтэдэ, үгы бол Улаан-Үдэ хотодо һуралсалаа үргэлжэлүүлхэ һанаатай.
Агын багшанарай колледжын директор Батор Баясхаланович Зандараев иигэжэ хөөрэбэ: «Байгша оной зун Улаан-Баатарта оршодог Дорнод аймагай буряадуудай эблэлтэй хэлсээ баталһан байнабди. Урдань манай багшанар өөһэдөө буряад һомонгуудаар ябажа, үхибүүдтэй уулзажа, иишэнь уридаг байһан. Жэшээнь, БГУ-гай директор байхадам, 2014 ондо Монголой аймагуудаар ябажа, юһэн хүниие түрүүшынхеэ һургуулидаа абаһан байнабди. Тэдэ оюутад һургуулияа амжалтатай түгэсхөөд, саашаа Улаан-Үдэ һурахаяа ошоо һэн. Һүүлээрнь 2015 ондо 18 оюутадые абаабди, 2016 ондо манай филиалай хаагдахада, энэ ажалнай тогтоо. 2017 онһоо тус колледжын директорээр томилогдожо, энэ ажалаа саашань ябуулааб. Баян-Уул, Баяндун, Дашбалбар, Сагаан обоо г.м. томо һомонгуудай һургуулинуудаар ябажа, хүүгэдтэ колледж, түлбэригүйгөөр һураха арга боломжо тухай хөөрэжэ үгэһэн байнабди, букледүүдые тараагаабди. Монголдо түлбэригүй һургуули байдаггүй ха юм. Тэндэхи һургуулинуудаар эндэ һурадаг оюутадтай суг ябаабди. Наһаар сасуу нүхэдэйнгөө хөөрэхэдэ, үхибүүд һонирхоно.
Дэлгэрэнгыгээр 51-дэхи дугаарта
