«Эрхим багша» конкурсдо хабаадагшад.

   Агын Буряадай тойрогой Захиргаанай социальна һалбариин хүтэлбэриин дарга, жюриин түрүүлэгшэ Билигма Будаева сугларагшадые амаршалаад, заншалта болоһон, 4-дэхеэ үнгэргэгдэжэ байһан конкурс багшанарай дүй дүршэлөө мүлихын, шадабарияа харуулхын мүрысөөн гэжэ тэмдэглээд, хабаадагшадта амжалта хүсөө.
   Удаань тон эдэбхитэй, талаан бэлигтэй, аймаг соогоо илажа гараһан эрхим багшанар тайзан дээрэ уригдаа. Эдэ хэд бэ гэбэл, Агын 1-дэхи, Үзөөнэй, Уртын, Шулуутайн дунда һургуулинуудай эхин шатын ангинуудай багшанар Ирина Батоева, Светлана Тогонова, Доржиханда Харалдаева, Маргарита Цыденжапова, Тугшанай, Хара-Шэбэрэй, Хүнхэрэй дунда һургуулинуудай буряад хэлэнэй багшанар Гэрэлма Дашинимаева, Цырен-Дулма Ленховоева, Билигма Эрдынеева гэгшэд.
   Конкурсын түрүүшын шатада багшанар Агын 1-дэхи дунда һургуулиин болон Агын гимназиин һурагшадта хэшээлнүүдые үнгэргөө. Хоёрдохи шатада мастер-классууд харуулагдаа. Багша бүхэн һайн бэлэдхэлтэй, элдэб һонин сэдэбэээр дүршэлѳѳ харуулба. Жэшээнь, Хара-Шэбэрэй дунда һургуулида 33 жэлэй туршада буряад хэлэ амжалтатай заажа ябаһан дээдэ категориин багша Цырен-Дулма Ленховоева буряад арадай «Үһэ хайшалалга» ёһо заншалтай танилсуулаа. «Энэ найрта тон дүтын түрэлхид суглардаг. Үһэ хайшалалга иимэ гуримтай: хүбүүн байбалнь, 3-тайдань хайшалдаг, басаган һаань, 2-тойдонь болохо; наранай гараагүй байхада эхилхэ (үдын урда)» г.м. олоной мэдэхэшьегүй, туһатай гуримууд тухай хөөрөө. Билигма Эрдынеева «Гэр бүлэ» гэһэн сэдэбээр угай һалаа тухай харуулан ойлгуулдаг арга хэрэглэжэ, аба эжын талаһаа уг удамуудтай танилсуулаа. Ирина Батоева «Эхин шатын һуралсалай эрьелдүүлһэн (перевёрнутый) хэшээлэй модель» гэһэн сэдэбээр тэмдэгэй нэрэнүүдые шудалха аргатай хубаалдаа. Доржиханда Харалдаева «Сомпи уяха арга» сэдэбтэй байжа, бүхы хабаадагшад, жюриин гэшүүд - булта эбтэйгээр Доржиханда Цыбенгылыковнагай ударидалга доро үндэһэтэнэй онсо өөрсэ сомпи (арадаймнай хубсаһанай тобшо) уяа. Маргарита Цыденжапова «Аба эжын һургаалһаа» сэдэбээр мастер-класс харуулхадаа, сингапурска һуралсалай онол аргануудые – Хай файв, Конерс, Си-Финк-Уанде г.м. хэрэглэжэ, гүнзэгы ойлгосо, анхарал, шэнжэлэлгэ, нэгэдүүлэн шэнжэлхэ арга хүмүүжүүлэгдэнэ гэжэ ойлгуулаа. Гэрэлма Дашинимаева «Movavi video видеоредактор буряад хэлэнэй хэшээлдэ» гэһэн сэдэбээр мастер-классайнгаа үедэ видеоролигуудые яажа бүтээхэб гэжэ заагаа. Гэрэлма Зориктуевна тус программа хэшээлнүүдтээ гүнзэгыгөөр хэрэглэдэг, дидактическа материалнуудые бэлдэжэ, хүүгэдэй һонирхол татадаг байһанаа мэдүүлээ. Удаань сугларагшадта багахан видеоролигуудые дурадхаа. Светлана Тогонова «Нюуса тобшо – QR-код һуралсалда хэрэглэлгэ» гэһэн мастер-класста QR-кодой удха шанартай, бии бололготой танилсуулаа, энэ үгэ буряад хэлэн дээрэ «түргэн» гэжэ оршуулагдадаг. Нюуса тобшо мүнөө сагай ажабайдалда үргэнөөр хэрэглэгдэдэг, жэшээнь, кэшбек, чегүүд соо байдаг. Светлана Цыбеновна QR-код хэшээлдээ яагаад хэрэглэдэг тухайгаа тодорхойгоор хөөрөө.

You have no rights to post comments