Сагаан-Шулуутайн һургуулиин басагад гар бүмбэгэ сохилгоор амжалта туйлажа, хаа-хаанагүй суурхадаг болонхой. Хэн һоригшонь бэ, һайн һорилгын үрэ дүн ха гэһэн бодомжонууд тэрэ дары толгойдо ороно. Энээниие уламжалан харахада, 2003 онһоо Могойтын хүүгэдэй тамирай һургуулиһаа һоригшоор Борис Доржиевич Доржиев хүдэлжэ эхилһэн байна. Тамирай абьяастан 1947 оной янгинама хүйтэн январиин 3-да Хёлгын аймагай Могзондо түрэһэн намтартай. Нютагайнгаа дунда һургуули түгэсхэһэнэй удаа Черновскойн ГПТУ дүүргээд, сэрэгэй алба уһан доогуур тамардаг онгосодо гараһан. Борис Доржи-ев гэртэхинэйнгээ зөөжэ ерэһэн Сохондо нютагта һургуулиин директорээр, физкультурын багшаар ажаллажа эхилээ. Хүдэлхэ саг соогоо Буряадай гүрэнэй багшанарай дээдэ һургуулиин тамирай факультет түгэсхөө.

   АГЫН АЙМАГ РУУ ЭЛЬГЭЭГДЭЭ
   Агын аймагай Шулуутай нютагай 8 жэлэй һургуулида физкультурын багшаар эльгээгдэжэ, саашанхи хуби заяагаа Агын Буряадай тойрогой эрдэм һуралсалай һалбаритай, тамир хүгжөөлгэтэй холбоо юм. Дүрбэн жэл хүдэлһэнэй удаа Аргалиин 8 жэлэй һургуулиин директорээр томилогдоһон байна, наһанайнь нүхэр Долгор Цыренова ород ба буряад хэлэнүүдые заажа ябаа. Хүдэлһэн һургуули бүхэндөө һургуулиин программада байһан тамирай янзануудые бултыень хүгжөөхые оролдодог байгаа. Борис Доржиевичай һорилго доро Шулуутайн, Аргалиин, Гүнэйн һургуулинуудай гүйгөөшэд тойрогой мүрысөөнүүдые шүүдэг болоо һэн. Шулуутайн һургуулида гимнастика, акробатикын кружок ябуулхадань, тэдэ уран һайханай харалгада ходо шангай һууринуудта гарадаг байһан бэлэй. Шулуутайн хүбүүд, басагад эрхимээр санаар гүйлдэдэг болоо. Борис Доржиевич коньки дээрэ зогсожо шададагшьегүй һаа, Шулуутайда хоккей бодхооһон юм. «Өөрөө валенка үмдөөд байхаш, хүүгэд коньки дээрэ гүйлдэхэ. Теори ба зааха арга һайнаар мэдэхэ байхадаа һоридог һэнби», - гэжэ тэрэ хөөрэнэ.
   Борис Доржиевич өөрөө гар бүмбэгэ сохилгоор Шулуутай, Аргали болон Гүнэй нютагуудай можын бүридэлдэ наададаг байһан юм.

   ОЛОН ШЭГЛЭЛТЭЙ ТАМИРАЙ КОМПЛЕКС НЭЭЛГЭһЭН
Борис Доржиевич гэр бүлын шалтагаанаар нүхэрэйнгөө Сагаан-Шулуутай нютагта түбхинэжэ, соёлой болон тамирай комплексын директорээр хүдэлжэ эхилээ. 1980 ондо СССР-эй профсоюзуудай ВДФСО-гой I съездын делегат болохо аза талаантай байгаа, тэндэ Шэтын можоһоо бүгэдын суглаанай гэшүүнээр һунгагдаа һэн. Тиихэдээ Борис Доржиевич Агропромой шугамаар мори урилдаан, гар бүмбэгэ сохилго, бүхэ барилдаан, һур харбаан болон теннис – 5 янзаар бэеэ һорихо үхибүүдэй тамирай һургуули нээлгэһэн байна.
   Мүнөө 8-дахи ангиин басагадые 4-дэхиин байхаһаань һорино. Нёдондо жэл Сагаан-Шулуутайн 2004 оной басагад гар бүмбэгэ сохилгоор Үбэр Байгалай хизаарай мүрысөөндэ аймагай бүридэлдэ 3-дахи һуури эзэлээ. Мүнөө жэл энэ турнирай дүримөөр, можын гэшүүд нэгэ һургуулиин байха ёһотой байгаа. Басагад аймаг соогоо шүүгээд, апрелиин эхеэр Ясногорскдо хизаарай дүтүүр байһан бүлэгэй (кустовой) 5 аймаг сооһоо илагша болоо. Үбэр Байгалай хизаарай мүрысөөндэ 8 можо соо түрүү һуури эзэлжэ, Алас Дурнын зүгэй тойрогой «Серебряный мяч» турнирай финалда ошохо эрхэтэй болоо һэн. Харгыдань мүнгэн һомологдоогүй, тиигээд Комсомольск-на-Амуре ошоходонь, гэртэхиниинь, багшанар, дэлхэйн элдэб булангуудаар ажаһуудаг нютагайхидынь мүнгөөр хамһажа эльгээгээ бэлэй. Тэрэ мүрысөөндэ Камчаткын хизаарайхидые шүүгээ, бэшэ 3 можодо илагдаа. Тиибэшье баян дүршэлтэй наадагшад холын нютагтай танилсажа бусаа. Анханда колхозоор барюулһан комплекс һандарһан, мүнөө гар бүмбэгэ сохилгоор һорилго һургуулиин тамирай танхим соо үнгэргэгдэдэг.
   «Танхим стандартда таарадаггүй, набтар, уйтан г.м., тиигээд үхибүүд томо танхим руу ороходоо «төөришэдэг». Техническэ талаар энэ ехээр нүлөөлдэг, жэшээнь, басагаднай Алас Дурнын зүгэй тойрогой мүрысөөндэ бэшэ можонуудтай ана-мана, тэдээнһээ доошо бэшэ сохилсоно. Томо танхимда тааража шадаагүй», - гэжэ Борис Доржиевич хэлэнэ.
   Тэрэ холо нютагаархид халуунаар угтаа, наадыень һанаагаа зобожо хараһан байна. Хүнхэр нютагай Цырен-Дулма Бабуева гэртээ абаашажа хүндэлөө, Сагаан-Шулуутайһаа гарбалтай багша Батомунко Гонгоровичой Вайбер соо уряа шэдэхэдэнь, хотын буряадууд сугларжа, сагаан-шулуутайнхидта болон түрүүшын һууринуудта гараһан Буряад ороной хүбүүд басагадта бэлэгүүдые барюулаа. Амар мүрэнэй эрьедэ ажаһууһан буряадууд нютагаархидаа халуунаар угтаһан, дэмжэһэн, үдэшэһэн байна.
   Май һарын эхеэр Первомайск тосхондо 2005-2006 онуудай басагадай хоорондо үнгэргэгдэһэн волейболоор мүрысөөндэ Сагаан-Шулуутайн волейболистканууд 12 можын дунда 2-дохи һуури эзэлээ, 1-дэхидэ – тугшанайхид. Нёдондо Шэнэ жэлэй тойрогой турнирта түрүүшын һуури эзэлээ һэн, харин мүнөө жэл – гурбадахиие. Мүнөө жэлэй тамирай хаһа сагаан-шулуутайн гар бүмбэгэ сохигшодто амжалтатай, үрэжэлтэй байгаа. Нютаг ороноо холо дүтүүр гар бүмбэгэ сохилгоор суурхуулжа ябадаг, һоригшын омогорхол, Алас Дурнын зүгэй мүрысөөндэ хабаадагшад гэбэл, Арюна Митупова, Арюна Доржиева, Виктория Бабуева, Виктория Батуева, Мыдык Николаева, Юлия Базарова, Кристина Жамсаранова, Маргарита Раднаева гэгшэд болоно.

You have no rights to post comments