Ушарбай нютагай жэнхэн галзууд омогой Жабай Тугдумай гэр бүлэдэ дүрбэн хүбүүдэй удаадахи, дороо гурбан басагадые дахуулһан, абыншье болон Доржын Дашинима нагасын талаар суута дархаша, нарин нягта оёдолшо угтай Чимитцырен Батодалаева 2019 оной «Элинсэгэйм алтан шүрбэһэн» харалга-мүрысөөндэ гран-прида хүртөө һэн.
   Уран гартанай ажалаар, амжалтаар болон түсэбүүдээр һонирхоходомнай, иигэжэ хөөрөө:
   - Би оёходоо, бүхы юумыень урданай ёһо заншалаар бүтээхые оролдодогби. Эжымни нарин нягтаар оёхыемни заажа үгэһэн.

   Яагаад ёһо соонь хэб хэхэб, тохой, булуубша хэды сантиметр байхаб, жэшээнь, та-тааһан 4-5 см үргэнтэй, тууза даруулхадаа, 0,4 см хүбөөлһэн хоргоймнай бултайха гэхэһээ эхилээд, дэгэлэй зүйлнүүд өөрын дүримүүдтэй юм. Цыпелма Нанзатовна багшамни ехэ юумэ зааһан. Уран оёдолшон Цыденжап Цыбиковна баһал сэнтэй зүбшэлнүүдые үгэжэ байдаг. 1928 оной Доржын Цыбжит эжымни ошохо бү-римни дэгэл оёжо һуудаг һэн, би оройдоошье тоодоггүй, ород хубсаһа оёдог байгааб. 2007 ондо «Театр мод» гэһэн сүлөө сагаа үнгэргэдэг байшанда шэнэ коллектив бии болоо. Тэн-дэ Намжилма Эрдынеевагай гоё зурагуудаар һажаалгаһан маягтай хубсаһа оёдог болоходоо, буряад үндэһэн хубсаһаар һонирхожо эхилээ һэм. Элдэб малгай ёһо соонь хэжэ шадахагүйдэ, муу байгаа. Зорюута ажалһаа 2 үдэр абажа, эжыдээ ошожо заалгаһан хүм. 2012 оной «Алтарганада» Намжилма Цыренжаповнагай эскизээр «Модель Вселенной» сэдэбтэй хубсаһа дүү басагантаяа оёоб. Тиигээд энэ ажалнай түрүү һуурида гараа һэн. 2013 ондо энэл хубсаһаяа Якутск хотодо үнгэргэгдэһэн «Этно-Эрато» гэһэн үндэһэн хубсаһанай Евразиин түрүү-шын конкурсдо абаашажа, 100 гаран хабаадагшадай дунда түрүү һуури эзэлээ һэмди. Түрүүшын «Элинсэгэйм алтан шүрбэһэн» харалга-мүрысѳѳндэ баһал Намжилма Эрдынеевагай зурагаар «Амар сайн» ансамблиин хубсаһа оёо һэнби, тиигэжэ тэндэ 2-дохи һуурида гараа бэлэйб. Могойтын хүүгэдэй уран урлалай байшанай, «Ургыхан» болон «Калейдоскоп» гэһэн хүүгэдэй хатарай ансамбльнуудай хубсаһа оёо һэм. Тэдэ, Уласхоорондын конкурснуудай илагшад, Казань хотодо «Нерпушки» хатарта үмдэһэн хубсаһаараа «Эрхим хубсаһан» янзада шанда хүртэһэн юм.
   Чимитцырен Тугдумовна 2017 ондо «Элинсэгэйм алтан шүрбэһэн» гэһэн үндэһэн хубсаһанай харалга-мүрысөөндэ түрүүшынхеэ өөрынгөө нэрээр гаража, гран-прида хүртэһэн, мүнөө жэл тус мүрысөөндэ үндэһэн хубсаһанай эрхим уран гартан байһанаа гэршэлээ, баһал гран-при абаа.
   Угаа дамжан, Чимитцырен Тугдумовнагай 2 дүү басагад - баһал оёдолшод. Цыпелма Бальжинимаева багшань: «Чимит-Цырен шэнги иимэ жэгтэй нарин нягтаар оёдог хүнтэй дайралдаагүйб, үшөө Васса Бабужапова, Руслан Батожаргалов гэгшэд тусгаар сэбэрээр оёдог. Чимитцырен Тугдумовна гансаараа, хүнэй туһагүйгөөр оёдог байна. «Нэгэ гараар хэхэдэ дээрэ. Олон гар элдэбын болохоо һанаха», - гэжэ тэмдэглэнэ.
   Агада буряад гутал оёхо хүн хомор гэжэ дууладаг һэм. Энэ асуудалаар Чимитцырен Тугдумовнада хандахадам, иигэжэ хөөрэнэ: «Буряад гутал оёдог хүнэй Агада бии, үгыень мэдэнэгүйб. Би урданай нэгэн-хоёр гутал хүнһөө олоо һэм, аймагай соёлой таһагайхид үни сагта Шэнэхээнһээ худалдажа абаа һэн, тэдэнь хуушараа. Могойтын шэнэхээнэйхидэй магазинда табигдаһан буряад һайн гутал гашуухан сэнтэй, 30 мянган түхэригтэ. Тиимэһээ өөһэдөө оёжо һураха хэрэгтэй.
   Гуталай эрмэг яагаад шэрэхэб гэжэ нэгэ хүн харуулхаб гээ һэн. Шэнэхээнэйхид лэ оёдог, элдэб шанартай гутал дайралдадаг, гоёор, али тиигэд гээд оёгдоһоншье байдаг. Эжымни анханда гутал оёдог байһан. Мүнөө эжы наһатай болоо, тиибэшье тон баряад һуужа байгаа һаам, бага сага харуулха, иигээд гэжэ хэлэхэтэй. Могойтодо Шэнэхээнэй нэгэ һамган оёдог гэжэ дуулаа һэм. Мэдэхэ зониие оложо, оролдожо заалгаа һаа гэжэ һанаатайб».
   Дала наһа холо гаратараа оёдог байһан Цыбжит эжынь Чимитцырен басаганайнгаа амжалтаар омогорхожо, өөрын баян дүршэлөөр басагантаяа хубаалдажа, сэнтэй зүбшэлнүүдые хэлэжэ байдаг юм.

You have no rights to post comments