«Сентябриин 7-һоо 20 болотор короновирусаар үбдэһэн зоной тоо эрид олошороо. Бүхыдөө 747 хүн үбдөө, хизаар соохи үбшэнтэдэй 13,2 хуби болоно. Энэ хадаа бүхы ажаһуугшадай тоодо абаад харахада, ехэл хуби болоно», - гэжэ оперативна штабай түрүүлэгшэ Буянто Батомункуев хэлээ. - Үбшэнэй ехэ болохогүйн түлөө гол шухала арга хэмжээнүүдые абаха хэрэгтэй. Үбшэнэй иимэ зандаа байгаа һаа, хүүгэднай дистанционно һуралсалда гараха, наймаагай, ниитын хоолой газарнууд хизаарлагданги гуримда хүдэлхэ.

Тиимэһээ үбшэнэй бүридхэлөөр үдэр бүриин мониторинг үнгэргэхэ, ниитын газарнуудаар, харин наймаагай, ниитын хоолой объектнүүдтэ аюулгүй гурим эбдэхэ ушарнуудые элирүүлхэеэ шалгалта ба рейднүүдые үнгэргэхэ хэрэгтэй. Хүн бүхэндэ бэеэ хамгаалха хубиин хэрэгсэлнүүд заатагүй хэрэгтэй гэжэ ойлгуулха».

 «Тохёолдоһон байдалаар харахада, ажаһуугшад бэеэ һэргылхэеэ болёо. Бүхы пандемиин үедэ 3169 тогтоо бэшэгдэһэн һаа, сентябриин 21-дэ үбдэһэн ба тэдээнтэй харилсаһан зондо бэеэ амяарлан байха 1210 тогтоол гаргагдаа.  Дэлгэрүүлгын 13 ушааг тэмдэглэгдээ, тэдэнэй 6-иинь эмхидэмэл коллективүүд соо. Жэшээнь, ажалай коллектив соо үбшэнэй 9 ушар тэмдэглэгдээ. Эпид-шалгалтаар үбшэнэй узуур үндэһэн гэхэдэ, суг хүдэлдэг хүнэй түрэһэн үдэр тэмдэглэлгэ байба», - гэжэ Агын Буряадай тойрогоор Роспотребнадзорой Хүтэлбэриин хүтэлбэрилэгшэ Бальжима Ракшаева хэлээ.

Үбдэһэн хүнэй тоогоор  «Ага тосхон» хотын тойрог түрүүлнэ, тэндэ 322 хүн бүридхэлдэ абтаһан байна, тэдэнэй 44-иинь - һүүлшын долоон хоног соо. Дистанционно һуралсалда дунда мэргэжэлтэ 2 һургуули, Ага тосхоной зарим һургуулинуудай классууд, карантинда «Родничок» хүүгэдэй сэсэрлиг хаагданхай, «Багульник» сэсэрлигэй - зарим бүлэгүүд.

 «65 наһатай зоной дунда амяарлан байха гуримай хүдэлбэшье, тэдэнэй дунда үбдэһэн зоной тоо бүхы үбшэнтэдэй 20 хуби болоно, харин 7-һоо 14 наһан болотор үбдэһэн һурагшад - 30 хуби.

Сентябриин 16-да иимэ тохёолдоһон ушараар Ага тосхондо толгойлогшын тогтоолоор, олон хүнэй хабаадалгатай хэмжээ ябуулгануудаар хэдэн хизаарлалта гаргагдаа. Эмхинүүдэй хоорондын комиссида наймаагай 11 объектдэ аюулгүйн арга хэмжээ эбдэлгын ушарнууд харагдаа, 3-дань административна эбдэлгын протоколнууд бэшэгдээ.

Үбэр Байгалай хизаарта наһатай зондо амяарлан байха гурим зандаа, баг зүүхэ, социальна зай сахиха хэрэгтэй. Эдэ арга хэмжээнүүдэй сахилга ами наһыемнай абарха ха юм.

You have no rights to post comments