- Баир Базаржапович, уншагшадыемнай намтартаяа богонихоноор танилсуулыт даа.
- Би 1961 оной январиин 19-дэ Дулдаргын аймагай Yзөөн нютагта түрэһэнби. 1977 ондо Yзөөнэй дунда һургуули түгэсхѳѳб. 1979 ондо Эрхүүгэй политехническэ дээдэ һургуулиин барилгын факультедтэ орожо, 1984 ондо дүүргэһэнби. Тиигээд хубаарилгаар Краснокаменск хото ошооб. Тэндэ 1988 он болотор Приаргунскын 6-дахи барилгын ба хагсаралгын хүтэлбэридэ ажаллаа һэм. 1988-1994 онуудта Краснокаменскын «Ведущий проектно-изыскательский и научно-исследовательский институт промышленной технологии» гэһэн эмхидэ САПР бүлэгэй (система автоматизированного проектирования работ) хүтэлбэрилэгшөөр хүдэлөөб. Һүүлээрнь 1988 онhоо олзын хэрэг эрхилэгшэ болооб, Краснокаменскда 2007 он болотор ажаhууһанби. Мүнөө гол ажални түлэблэлгэ, барилга, хажуугаарнь худалдаа наймаан, барилгын материалнуудые үйлэдбэрилдэгби.
- Нэгэ проект хэр удаан бэлдэдэгбта?
- Нэгэн-хоёр hара болодог, томо проектнүүд удаахан бүтэдэг, ажалтай, юуб гэхэдэ электрик, теплотехник, сантехник, архитектор г.м. олон хүниие хабаадуулха хэрэгтэй.
- Танда проектнүүдые хаанаhаа ерэжэ захидаг бэ?
- Агын тойрогhоо, Шэтэһээ, Хэрын, Акшагай, Краснокаменскын аймагуудhаа г.м. олон тээһээ ерэдэг.
- Барилганууд тухайгаа хөөрэжэ үгыт даа.
- Барилгын ажал олон, жэшээнь, Краснокаменск хотодо ба Краснокаменскын аймагта олониитын-соёлой байшангууд (болбосон түхэлтэй гэрнүүд, соёлой байшангууд, котельнинүүд, газаахи түлилгын системэнүүд ба канализаци, харгынууд, hородог станцинууд, резервуарнууд, hүбэ нүхэнүүд, уһанай подстанцинууд гэхэ мэтэ) баригдаһан.
Ага тосхондо «Балжан хатан» комплекс, Дулдаргын аймагай захиргаанда залгалаа байшан, 250 хүүгэдэй һурахаар Yзөөнэй дунда һургуули, тиихэдэ олон магазинууд гэхэ мэтэ.
- Ямар томо объектнүүдтэ түлэблэлнүүдые зохёогообта?
- Дулдаргада «Бизнес-центр», ЗАГС, «Россельхозбанк» эмхинүүд, «Тамир» ба «Сандал» кафенүүд, «Мегадар» оптово склад, хоёр дабхартай «Берёзка» магазин, 90 һууритай «Бэлиг» гэһэн хүүгэдэй сэсэрлиг, Yзөөндэ соёлой байшан, эмнэлгын амбулатори, Ага тосхондо түймэр саралгын частьда залгалаа байшан, «Заречный» магазин гэхэ мэтэ объектнүүдые барилгын түлэблэл зохёоһонби. Агын тойрогой бюджетнэ эмхинүүдэй капитальна заһабарилгын сметэнүүдые табидагби.
- Хубиин байшан гэрнүүдые баридаг гүт?
- Баhал олон гэр бариһанби. «Молодая семья» программаар Дулдаргада, Yзөөндэ хамта найман гэр баряаб.
- Мүнөө ямар ажал хэжэ байнабта?
- Тугшанай хүүгэдэй сэсэрлигэй капитальна заһабарилгын проект дүүргээб, мүнөө гүрэнэй шалгалтада тушаагаабди. Тугшанай дунда һургуулиин ба Yзөөнэй эхин шатын һургуулинуудай капитальна заһабарилгануудай түлэблэл хэхэбди. Тиихэдэ Балжана ба Элеэ һуурингуудай эхин шатын һургуулинуудта капитальна заһабарилга хэхэ проектнүүд бэлдэгдэжэ байна. Дулдаргын автовокзалай дэргэдэхи талмайн капитальна заһабарилгын проект хэхэбди. Олон бага ажалнууд бии. Эндэ hая Хэрын аймагай Мангудһаа наймаагай байшанай ба пекарниин проектнүүдые захяа. Проект захихадань, газарыень хаража, хэмжэжэ, фото-зурагуудые харадагби.
Буддын шажанда хабаатай барилгануудай проект, сметэнүүдые баhал хэдэгбди. Шэрээтэ Ирдынеев Баир ламхай Yзөөнэй дасандаа Майдари бурханай дуган бариха ехэ һанаа хүсэлтэй һэн. Мэндэ байхадаа захиһан проект, сметэнүүдынь булта бэлэн болоhон. Yзөөнэй архитекторнүүд Тумэн Цыденжапович Цыденжапов ба Жаргал Галсандоржиевич Дамдинов спонсорнууд боложо, энэ дуганай «3D дизайн» зуража үгөө. Тиихэдэ Краснокаменскын дасанай түлэблэл дүүргэбэбди.
- Барилгын ажал хүндэ хэсүү бэзэ даа…
- Бараг, тон дуратай ажални.
- Баир Базаржапович, гэр бүлэ тухайгаа хөөрэжэ үгыт.
- Цымпилма нүхэрни Yзөөн нютагай, мэргэжэлээрээ экономист-финансист, 1990 ондо Эрхүүгэй арадай ажахын дээдэ һургуули дүүргэһэн. 1990-2006 онуудта Краснокаменск хотодо ФСИН-дэ ажаллаhан, тушаалhаа амаралтада гараhан дотоодын албанай капитан. «125 лет Управлению исполнения наказаний Министерства юстиции Российской Федерации» гэһэн энгэрэй тэмдэгээр шагнагдаһан, грамотануудта хүртэһэн. 2008-2014 онуудта Дулдаргын «Россельхозбанкда» ахалагша экономистаар, хүтэлбэрилэгшөөр ажаллаа. Хоёр һайхан басагадтайбди, хүбүүтэйбди, зээ хүбүүтэйбди.
Ехэ Оксана басагамнай 1984 ондо түрэһэн, 2001 ондо Краснокаменскын 1-дэхи дунда һургуули дүүргээд, Шэтын эмнэлгын академидэ һураа һэн, мүнөө стоматологоор хүдэлнэ, нэгэ басагатай юм. Бага Белигма басагамнай 1992 оной, 2010 ондо Дулдаргын 1-дэхи дунда һургуули түгэсхэжэ, Эрхүү хотын Байгалай гүрэнэй экономико ба хуулиин университедтэ һураа, экономист-финансистаар ажаллана. Баир одхон хүбүүн 2003 ондо түрэһэн, 2020 ондо Дулдаргын 2-дохи дунда һургуули түгэсхөө, Новосибирскын сэрэгэй командна училищиин курсант юм.
- Баярлаа.
Категория: Ниигэм.
Автор: Цымжидма ДОЛГОРОВА.
