- Эржэна, өөр тухайгаа хөөрыш даа.
- Би Дулдаргын аймагай Алхана нютагта 1995 ондо түрэhэнби, бодонгууд омогойб. Дунда hургуулияа түгэсхөөд, саашаа hурахаяа Эрхүү хото ошооб. Тэндэ Эрхүүгэй гүрэнэй университедтэ бүхэдэлхэйн түүхэ ба педагогико шудалааб, Байгалай гүрэнэй экономико ба хуулиин университедтэ хуули үзэhэн байнаб. Һуралсалайнгаа үедэ ород-япон, ород-солонгос харилсаа холбооной түүхэтэ үенүүд тушаа олон статьянуудые бэшээ hэм.
- Юундэ Солонгос ошохоёо шиидээбши?
- Минии нүхэр пандемиин урда тээ Солонгосто ажаллахаяа ошоо hэн. Тиихэдэнь 2020 ондо университедээ түгэсхөөд, нүхэртөө Сеул хото ошохо болооб. Харин пандемиин үедэ визэгүйгөөр хилэ гараха аргагүй байхадань, би Кёнбок университедэй солонгос хэлэнэй программада оролсожо, оюутанай визэтэй болоод, Сеул ошожо шадааб. Мүнөө солонгос хэлэнэй курснуудта hуража байнаб. Арадай түүхэ, соёл үзэхэдэ, ехэ hонирхолтой бшуу, хэлыень мэдэхэдэ, бүри hайн, юуб гэхэдэ олон зуун жэлэй ёhо заншал, гуримуудтайнь танилсажа, мүнөө сагай ажабайдал, ниигэмэй хүгжэлтын онсо илгаа тушаа hайн мэдэсэтэй болохоор юм.
- Танай бүлэг соо ямар гүрэнэй оюутад hурадаг бэ?
- Япониин, Хитадай, Америкын, Испаниин, Турциин, Индонезиин, Беларусиин, Казахстанай эрхэтэд һурадаг, манай гүрэнэй олон хүбүүд басагад бии, олонхинь Москваhаа юм. Бүлэгтөө англи ба солонгос хэлэнүүд дээрэ хөөрэлдэдэгбди. Булта бэе бэедээ туhалжа, хани барисаатай байхаяа оролдодогбди. «Монголнуудтай түрэл, Ород гүрэндэ, Байгал нуурай шадарта, Yбэр Байгалай хизаарта ажаhуудаг буряад яhатанби» гэхэдэмни, Америкын залуушуул ехэ hонирхоо hэн.
Буряадууд солонгос арадтай олон адли заншалнуудтай, жэшээнь, аха захатанаа, элинсэг хулинсагаа, ёhо заншалаа маанад шэнгеэр лэ хүндэлдэг байна.
- Түрэл нютагаа hанадаг гүш?
- Һанадаг. Сеулда буряад, ород эдеэнэй «Байгал» гэжэ кафе байдаг, Табтаанай нютагай Жаргалма Цыреновна эзэниинь, тэрээнтэй хөөрэлдэхэдөө, сэдьхэлни амардаг. Карта дээрэ Солонгос орон жааханшье hаа, олон гүрэнэй оюутадые нэгэдүүлдэг. Оюутад эндэ hуралсалай хажуугаар ажаллаха аргатай юм. Би үдын урда hураад, үдын хойно эдеэнэй газарта ажалладагби, салиниинь hайн, харин ажалынь хүнгэн бэшэ. Олон хүбүүд басагад заводуудта ажалтай, дэлгүүртэ, почтодо хүдэлдэг, танилнуудни фото-зураг буулгадаг, ном үзүүлдэг - бэеэ даагаад, hайн ябаха арга боломжотойбди.
- Олон нүхэдтэй болоо бэзэш?
- Тиимэ. Нүхэдни намайе Бээжэн, Стамбул, Куала-Лумпур уридаг, би урдаhаань Yбэр Байгалай хизаарайнгаа Алхана нангин шүтөөнтэй түрэhэн газартаа бултыень уридагби.
- Саашанхи түсэбүүдшни ямар бэ?
- Зорилгонуудаа туйлахадаа, hургуулияа дүүргээд, дүй дүршэлтэй болоод, нютагайнгаа хүгжэлтэдэ хубитаяа оруулха түсэбтэйб.
Цымжидма ДОЛГОРОВА.
