«Толон» газетын 14-дэхи дугаарта сэтгүүлшэн Жалсан Лубсандашиев Түнхэнэй аймагай Толтой нютагта эмхидхэгдэхэ «Буряад мориной соло» гэhэн фестиваль-мүрысөөндэ Зүдхэлиин Баир Доржиевай өөрын дураар морёор ошохо зорилготойень бэшээ hэн.
Байгша оной апрелиин 25-да 11 сагта зүдхэлиинхид Мунханай дэргэдэ олоор суглараа, морёор үргэн харгыда гаража ябаhан нютагайхидаа үдэшэжэ, үреэлэй үгэнүүдые хэлээ. Yмсын ажахытай бодонгууд омогой Баир Доржиев хоёр дүү хүбүүдтэеэ, Зоригто хүбүүнтэеэ, Максар аша хүбүүнтэеэ Түнхэн хүрэтэр морёор аянда гараа.
Зүдхэлиин захиргаанай толгойлогшо Баир Галсанширапов: «Түнхэндэ июниин 10-да эхилхэ «Буряад мориной соло» гэhэн фестивальда эдэмнай хабаадахаяа зорибо. «Конный поход на бурятских и забайкальских лошадях по маршруту «Онон, Алханай, Байкал, Саяны» гэhэн түлэблэлөөр буряад үүлтэрэй моридоор аянда гараба. Тэдэ hара хахад ябажа, Түнхэн хүрэхэ ёhотой», – гэжэ хэлээ.
Зүдхэлиин аяншалагшадые Шэтэ хотын Угдаанда ажаhуудаг нютагайхидынь «Дангина» кафегэй дэргэдэ хүсэтэйгөөр угтаа. Ород яhатан Пасхын hайндэртэ тудаhандань, кулич ба үнгэтэ үндэгэнүүдээр, буряадууд арадайнгаа заншалта хадагаар угтаба.
Валентина Цыренжапова.
