Цыбен Жамцараногой нэрэмжэтэ хизаарай номой сан «Толоной абдарһаа» (Бүгэдэ буряадай «Толон» газетэ суг уншаябди») гэһэн хизаарай акци эмхидхэнэ. Тус акци Агын Буряадай тойрогой Захиргаанай дэмжэлтээр үнгэргэгдэнэ юм.
Тус хэмжээ ябуулга буряад хэлэеэ, ёһо заншалаа, түүхэ соёлоо хүгжөөхэ ба дэлгэрүүлхэ болон орон нютагаа шэнжэлхэ, тоонто нютагтаа, эхэ орондоо дуратайгаар хүмүүжүүлхэ, тойрогой зохёохы бэлигтэй залуушуулые, ажаһуугшадые элирүүлхэ зорилготойгоор апрелиин 1-һээ майн 31 болотор үнгэргэгдэнэ.
Үбэр Байгалай хизаарта буряад хэлэн дээрэ гарадаг ори ганса хэблэл «Толон» газетэ – түрэл хэлэтэ толилолгонуудай тон баян архив гэжэ тэмдэглэхээр. Тиимэһээ шэнжэлэлгын ажал бэшэлгэдэ, түрэл хэлэеэ шудалалгада угаа туһатай юм. «Толон» һониной статья, очерк болон һонинуудые шангаар уншуулжа, буряад абяа шагнуулжа, эдиршүүлые, залуушуулые түрэл хэлэндэнь дурлуулха арга бии.
Хабаадагшадта видео буулгахадаа, «Толон» газетын «Улаалзай», «Дунгар», «Үетэн» тусхай дугаарнуудһаа болон «Барбаадай» нюурһаа толилолгонуудые хэрэглэнэ. Бүхыдөө конкурсдо 37 хүн видео-буулгабари эльгээгээд байна. Акшаагай аймагай, Гүнэйн, Сахюуртын, Агын, Алханын болон Агын 1-дэхи дунда һургуулиин һурагшад эдэбхитэйгээр хабаадана.
Апрель һарада Ц.Жамцараногой номой сангай мэргэжэлтэд Акшаагай аймагай Хуралга, Нарһан нютагуудта номой үзэсхэлэн эмхидхэнгээ, худалдаанай номуудые абаад ошоһон байна. Тиихэдэ энэ акци тухай соносхогдоһон юм. Тэндэхи зон буряад хэлэ муугаар мэдэдэгшье һаа, оролдожо уншана, акцида ажалнуудаа эльгээнэ. Хуралга һууринай захиргаанай толгойлогшо Надежда Жаргалова «Толон» газетэ захидаг, акцида эдэбхитэй хабаадаа. Тэрэ «Толон» газетын туһаар буряад хэлэеэ шудалжа байһан тухайгаа хэлэһэн байна.
Тодорхойгоор акци тухай мэдэхын тула Ц.Жамцараногой нэрэмжэтэ хизаарай номой сангай сайтда орожо танилсахада болохо.
Нордоп БАБУЕВА.
