Июлиин 23-24-дэ Агын тойрогто хүлгөөтэй байба. Дүрбэн жэл тэсэмжэгүй хүлеэһэн «Алтаргана-2020» наадан Үбэр Байгалай хизаарта морилон буугаа…
Ехэ үйлэ хэрэгэй эхиндэ бороо, саһанай орохые араднай һайн тэмдэгтэй гэхэ бэзэ. Эгээл фестивалиин эхилхэ үглөөгүүр сахилгаалжа, бороон хүнэгөөр адхаһандал шааяжа, дэмбэрэлтэй үйлэ хэрэгтэ зүбшөөлөө үгэһэн мэтэ, тэрэнэй урагшатай һайн үнгэргэгдэхые һүлдэлжэ байһандал, газар дэлхэйемнай сүршөө, «Алтаргана» наада мүнхын дуһалаар арюудхаа.
Дүрбэн жэл соо олон хүнэй оролдолгоор, бэлэдхэлэй ехэ ажалай ашаар тус наадан үндэр хэмжээндэ, олон айлшадай хабаадалгатайгаар эмхидхэгдэбэ гээшэ. Фестивалиин хэмжээндэ 15 зохёохы болон 6 тамирай мүрысөөнүүд болоо. Айлшадай бэеэ сэнгүүлхэ, сэдьхэлээ амаруулха, нюдөө хужарлуулха «Агын Арбат» гэһэн ябаган талмай, музей болон номой сангуудта үзэсхэлэнүүд, бэеын энхэ элүүртэ зорюулагдаһан талмайнууд хүдэлөө, концерт-нааданууд, дискотекэ, «Түүдэгэй наадан» г.м. хэмжээ ябуулганууд эмхидхэгдээ. Гадна Социалис Ажалай Баатарнууд Михаил Болотовто, Балдан Домбриловта хүшөөнүүдые нээлгын баяр ёһолол, малай үзэсхэлэн боложо, тамирай ба зохёохы мүрысөөнүүдһээ өөрэгүй олон хүнэй анхарал татаал даа. Сагай эрхээр бэе бэетэеэ хахасажа, хилын хоёр тээ үлэшэһэн түрэлхидэй урманда «Бэдэрнэб түрэлөө» гэһэн түлэблэлэй олониие нэгэдүүлһэн энэ ехэ нааданай хэмжээндэ үнгэргэгдэһэниинь тон һайшаалтай.
Июлиин 23-да үдэшын 5 сагта үй түмэн зоной, авто-унаануудай иишэ тиишээ һүндэлхэнь түргэдэбэ: Агын түб стадиондо «Алтаргана» нааданай нээлгын баяр ёһолол хужарлан хара-хаяа яарабад.
Энэ хэмжээ ябуулгада Федерациин Зүблэлэй түрүүлэгшын орлогшо Константин Косачёв, сенаторнууд Баир Жамсуев, Сергей Михайлов, Гүрэнэй Дүүмын депутадууд, Үбэр Байгалай хизаарай амбан захирагша Александр Осипов, Буряад Уласай Юрэнхылэгшэ Алексей Цыденов, Эрхүүгэй можын Засагай газарай түрүүлэгшын орлогшо Валентина Вобликова, Монгол Уласай аймагуудай амбан захирагшад хабаадаба.
«Алтарганын» жагсаалда мү-рысөөнүүдэй шүүгшэд, буряад соёл, тамирай үндэһэн янзануу-дые хүгжөөхэ хэрэгтэ хубитаяа оруулһан зон, Үбэр Байгалай хизаарай, Монголой, Хитадай, Буряад Уласай, Эрхүүгэй можын түлөөлэгшэд, Казахстанай, Кыргызстанай, Саха-Яхадай, Примориин хизаарай, Сахалинай, Москвагай, Санкт-Петербургын, Салехардын, Красноярскын, Калининградай землячествануудай түлөөлэгшэд – дүн хамта мянгаад хүн ябаа.
Александр Осипов «Алтаргана» нааданай һайндэр нээхэдээ, буряад арадай баялиг хадагалха, буряад арадые нэгэдүүлхэ хэрэгтэ тус фестивалиин үүргэ тухай, үргэн ехэ программатай, эгээ олон хабаадагшадтай тус һайндэрые бүхэдэлхэйн зэргэдэ гаргахаар гэжэ тэмдэглээд, буряадаар энхэ элүүрые, амжалта, аза талааниие хүсөө. Агын Бу-ряадай тойрогой Захиргаанай хүтэлбэрилэгшэ Буянто Бутомункуев «Алтарганын» һахюуһантай болоһон, «Морин эрдэни» гэһэн шэнэ мүрысөөнэй оруулагдаһан тушаа мэдүүлээ.
Тэрэнэй удаа «Алтаргана» нааданай туг бодхоогдоо, бүгэдэ зон «Амар сайн» театрай артистнарай гүйсэдхэһэн гүрэнэй, Агын тойрогой больницын ажалтадай дуулаһан тойрогой, Буряадай гүрэнэй оперо болон баледэй театрай гол дуушадай дуулаһан «Алтарганын» гимннүүдые хужарлан шагнаба, режиссёр Доржи Батуевай зохёоһон зүжэглэмэл наада нюдэнэй шэмэг болгон харабад.
Долгор РАДНАБАЗАРОВА.
Жалсан ЛУБСАНДАШИЕВАЙ фото.
Үбэр Байгалай хизаарай амбан захирагша А.Осипов хабаадагшадта буряадаар хандаа.
Зүжэглэмэл наадан буряад арадай түүхэдэ хабаатай байба.
