«Нангин бууса» гэһэн буряадуудай ажаһуудалаа зохёолгын болон ажаябуулгын эрхим жэшээнүүдэй мүрысөөндэ Буряад Улас, Эрхүүгэй можо болон Үбэр Байгалай хизаар түлөөлһэн 6 фермернүүд хабаадаа.
Тэдэнэр хүдөө буусада яажа ажал ябуулдаг, ямар аргаар ажахыгаа үргэдхэжэ, табан хушуун мал үсхэбэрилдэг тухайгаа 20 минутын хэмжээнэй фильмүүдые бэлдэһэн байна. Фильмын удаа хабаадагша бүхэн онлайн аргаар 10 минутын туршада өөртэеэ танилсуулаа, ажал тухайгаа хөөрөө. Шүүгшэдэй түрүүлэгшээр хүдөө ажахын байдал тон һайнаар мэдэдэг Владимир Цэдашиев хүдэлөө, тэрээнтэй суг Монгол Уласай түлөөлэгшэд, хүдөө ажахын эрдэмтэд Мядагмаа Чимеддоржи, Соёллхам Баттур, Усть-Ордагай Буряадай тойрогой Захиргаанай хүтэлбэрилэгшын орлогшо Андрей Дмитриев, «Буряад Уласай мэдээсэлэй-методологическа түб» эмхиин хүтэлбэрилэгшын орлогшо Эржена Цырендоржиева болон Агын тойрогой хүдөө ажахын «Гэрэл» эмхиин захирал Шойжит Тумурова гэгшэд ажаллаа.
Эсэстэнь Бадмажаб Батоев (Агын аймаг), Валерий Сахиров (Эрхүүгэй можо), Валерий Сукнев (Буряад Улас) лауреадууд боложо тодорһон байна.
Дарима БАЗАРОВА.

You have no rights to post comments