«Буряад хүнэй нэгэ үдэр» гэhэн аман зохёолой бүлгэ-мүүдэй харалга-мүрысөөн нюдэнэй шэмэг, шэхэнэй хужар болоо.
Мүрысөөндэ энээнhээ урда жэлнүүдтэ 25-39 болотор бүлгэм хабаададаг hаа, мүнөө жэл регион бүхэнhөө 2-2 бүлгэм наада харуулха эрилтэтэй байгаа. Тиигээд хамта дээрээ аман зохёолой 8 бүлгэм урилдаанда хабаадажа, гоё hайхан наадаяа харуулаа юм.
Мүрысөөнэй дүнгүүдээр, хабаадагшын баталамжа Улаан-Баатар хотын «Улаалзай» (хүтэлбэрилэгшэнь – Балжир Батмонх), Эрхүүгэй можын «Анга» (хүтэл-бэрилэгшэнь – Н.Хамгушкеев), Хэнтэйн аймагай Дадал сомоной (хүтэлбэрилэгшэнь – Ц.Янжмаа) бүлгэмүүдтэ барюулагдаа. «Буряад хүнэй нэгэ үдэр» харалга-мүрысөөнэй лауреадуудай нэрэ зэргэдэ Эрхүүгэй можын «Талын дуун» (хүтэлбэрилэгшэнь – П.Модоев), Үбэр Байгалай хизаарай Дулдарга тосхоной «Тоонто» (хүтэлбэрилэгшэдынь – Л.Бадмаева, А.Арбалжинов), Монгол Уласай Дорнод аймагай «Үлзын долгин» (хүтэлбэрилэгшэнь – Бат-Идэр Ганцэцэг), Буряад ороной Захааминай «Эжын буян» (Х.Цыденова) аман зохёолой бүлгэмүүд хүртэжэ, алтан медаляар, тус тустаа 100 мянган түхэригэй сертификадаар шагнагдаа.
Мүрысөөнэй эгээ дээдын гран-при шагнал Үбэр Байгалай хизаарай Сагаан-Шулуутайн аман зохёолой «Сахюурхан» бүлгэм абажа, алтан медальда, Буряад Уласай габьяата уран зурааша, мэдээжэ барималша, нютаг хүбүүн Жигжит Баясхалановай бүтээhэн кубогта болон 150 мянган түхэригэй сертификадта хүртөө бшуу. Гадна мүрысөөнэй хэмжээндэ тайзан дээрэ «Сахюурхан» аман зохёолой бүлгэмэй хүтэлбэрилэгшэ Лхама Балдановада Буряад Уласай Уран зохёолшодой холбооной гэшүүнэй үнэмшэлгэ барюулагдаа.
Нордоп БАБУЕВА.
