«Алтан саг» сурбалжалагшадай толилолгонуудай мүрысөөндэ Буряад Улас, Эрхүүгэй можо болон Үбэр Байгалай хизаар түлөөлһэн 12 хабаадагшадай ажал харагдаа.
Мүрысөөндэ үгтэһэн ажалнууд гурбан янзаар шүүмжэлэгдэһэн байна.
Буряад хэлэн дээрэ бэшэдэг хэблэлнүүд тон үсөөн гэжэ мэдээжэ, энэ янзада хэблэлэй гурбан эмхи хүдэлмэринүүдээ эльгээгээ. Тиин Оросой Уласай гурбан нютаг можодо гарадаг һонинууд: «Буряад үнэн» (Буряад Улас), «Толон» (Үбэр Байгалай хизаар) болон «Усть-Ордын үнэн» (Эрхүүгэй можо) буряадай уласхоорондын XIV «Алтаргана-2020» нааданай лауреадууд болобо.
«Буряад хэлэн дээрэ хэблэгдэһэн эрхим хүдэлмэри» гэһэн янзада гүнзэгы удхатай толилолгонуудые уншагшадта абтасатайгаар бэшэжэ шадаһан, уран, баян үгэтэй сэтгүүлшэдэй – «Толон» һониной харюусалгата секретарь Долгор Раднабазаровагай, «Буряад үнэн» һониной сурбалжалагша Булат Бадмаевай болон «Толон» һониной социальна политикын таһагай редактор Нордоп Бабуевагай ажалнууд үндэрөөр сэгнэгдээ.
Тиихэдэ «Буряад үнэн» болон «Толон» һониной, блогер Намжилма Бальжинимаевагай сайтнууд лауреадай нэрэ зэргэдэ хүртэбэ.
«Толон» һониной ахамад редактор Цыцык Тумуровагай ударидалга доро ажаллаһан шүүгшэд: Монгол Уласай телевидениин ба радиогой элитэ ажаябуулагшад Мүнхын Шиираб ба Ленинэй Мэндэхүү, «Буряад үнэн» һониной ахамад редактор Сарюна Эрдынеева, Усть-Ордагай Буряадай тойрогой «Панорама округа» һониной ахамад редактор Наталья Могзоева, «Толон» һониной таһагай редактор Дарима Базарова гэгшэдэй үүсхэлээр урмашуулгын шангууд тогтоогдожо, «Усть-Ордын үнэн» болон «Толон» һонинуудай сэтгүүлшэд Намжилма Цыденовагай, Валентина Цыренжаповагай удха түгэлдэр толилолгонууд, «Усть-Ордын үнэн» һониной энэ жэлдэ шэнэлэгдэһэн, һайн ерээдүйтэй сайт тэмдэглэгдээ.
Дарима БАЗАРОВА.

You have no rights to post comments