Дундаршагүй баян түүхэтэй, дууhашагүй элбэг ёhо заншалтай арадаймнай үеhөө үедэ дамжан ерэhэн заншалта шагай наадан hайхан даа!
Ага тосхоной стадион дээрэ XIV «Алтаргана» нааданай дүримэй ёhоор «Шагай няhалалга», «Шагай шүүрэлгэ», «Мори урилдаан» – гурбан янзаар үнгэргэгдэhэн мүрысөөндэ Монгол Уласhаа, Хитадай Шэнэхээн нютагhаа, Усть-Ордагай можоhоо, Буряад Уласhаа, Сахалинhаа, Ямало-Ненецкэ ба Агын Буряадай тойрогhоо 80 гаран хабаадагшад шанга тулалдаанда хаба шадалаа туршалсаа.
Тус мүрысөө эмхидхэһэн Россиин Федерациин эрдэм hуралсалай хүндэтэ хүдэлмэрилэгшэ, Агын Буряадай тойрогой габьяата багша, шагай наадаар Υбэр Байгалай хизаарай эрхим hоригшо Ц.Ц.Бадмажапова үндэр хэмжээндэ үнгэргөө.
Шагай няhалалгаар хубиин мүрысөөндэ 14 бүhэтэйшүүлэй хоорондо Урда-Ага нютагай, Агын нэгэдэхи дунда hургуулиин hурагша Аюша Мункуев түрүү hуури эзэлээ. 2-дохи hуурида Догой нютагай Бэлигто Цынгуев, 3-дахида Буряад Уласай Ивалгын аймагай шагайшан Нимацырен Дандаров гараа. 18 эхэнэрнүүдэй дундаhаа Зүдхэли нютагай шагайшан Долгорма Дориева эрхим hайнаар шагай няhалдаг гэжэ элирүүлэгдээ. Роза Тобоева (Υзөөн) – 2-дохи hуури, Чимита Дулмаева (Υзөөн) 3-дахи hуури эзэлбэд.
«Шагай шүүрэлгэ» янзада Зүдхэли нютагай, Дулдарга hууринда ажаhуудаг дүй дүршэл ехэтэй Батор Цыденжапов оройлоо. Ага-Хангилай Базар Балданов – 2-дохидо, Агын 1-дэхи hургуулиин 11 ангиин hурагша Элбэг Цырендоржиев 3-дахида гараа.
Шагай шүүрэлгээр шадамар бэрхэ байhанаа Марина Цыренжапова харуулаа. Тэрэ Һүдэнтэ нютаг тоонтотой, Дулдаргын 2-дохи hургуулиин эхин шатын ангинуудай багша юм. Цындыма Батомункуева (Дулдарга), Чимита Бадараева (Зүдхэли) тус тустаа 2-дохи, 3-дахи hууринуудые абаа.
Аюша Мункуев ба Элбэг Цырендоржиев И.Кобзоной нэрэмжэтэ хүүгэдэй уран урлалай байшанда hайн бэлэдхэл гараhан. Ц.Ц.Бадмажаповагай хүмүүжэмэлнүүд юм. Шагай наа-данай дүримөөр, «Мори урилдаан» янзада наhатайшуул хабаадажа, Сахюурта нютагай багшын ажалай ветеран Цындыма Жамбалова шүүжэ, эрхим шагайшан болоо. 2-дохи hуурида Цыцыгма Цыбенова (Ага-Хангил), 3-дахида Дарима Пурбуева (Ага-Хангил) гараа.
Мүрысөөнэй хоёрдохи үдэр, июлиин 24-дэ, шагай наадаар абарга шагайшанииие элирүүлхын түлөө шанга тэмсэл боложо, Дашинима Цыбенов илалта туйлаа. Д.Цыбенов гарбалаараа Алхана нютагай, Υзөөн нютагта ажаhуудаг, Дулдаргын аймагай больницада хүдэлдэг юм. Зүдхэли нютагай Долгорма Дориева шагай нааданай бүхы янзануудта илажа, абарга шагайшан болоо. Абарга шагайшадта тус тустань алтан медаль, кубок, баталамжа ба мүнгэн шан барюулагдаа.
Агын Буряадай тойрогой шагайшад эрхим дүн харуулжа, «Ага-3» гэhэн суглуулагдамал можо – 1-дэхи hуурида, «Ага-2» можо – 2-дохи hуурида, «Ага-1» 3-дахи hуурида гаража, Υбэр Байгалай хизаарайхид эрхимлээ.
Шангай һуури эзэлэгшэдтэ медаль, баталамжа ба мүнгэнэй сертификадууд барюулагдаа.
Агын тойрогто үнгэргэгдэһэн «Алтарганын» шагай нааданда хабаадагшад сэдьхэл дүүрэн, омог дорюун, эмхидхэгшэдтэ баяр баясхалан хүргэн, нютаг ороноо бусабад.
Баирма ДЫЛГЫРОВА.
