Эрын гурбан наадан «Алтаргана» фестивалиин гол шэмэг болодог юм. Монгол туургата арадуудай найр наадан хурдан хүлэгүүдэй урилдаангүйгөөр, бар хүсэтэй бүхэшүүлэй барилдаангүйгөөр, хёрхо мэргэн баатарнуудай харбаангүйгөөр үнгэрдэггүй. «Алтаргана-2020» фестивалиин эрын гурбан нааданда Монгол, Россиин олон нютагуудhаа 500 гаран тамиршад эрхимүүдээ элирүүлээ.
Мүрысөөндэ 302 хёрхо нюдэтэй мэргэшүүл мүрысөө. Буряад эбэр номоор эхэнэрнүүд ба эрэшүүл харбажа, түрэл можынгоо нэрэ хүндэ дээгүүр хамгаалхаяа оролдоо. Хамта 28 можын тү-лөөлэгшэд 14 зураахайда хубааржа харбаа юм. Эхин харбаанда харбаашад 50 ба 45 метртэ харбаа. Можын бүридэлдэ 6 эрэшүүл ба 3 эхэнэрнүүд ороо. Агын тойрогой hур харбаашадай можые ударидаhан Бато Загдае-вай мэдүүлhээр, нютагаймнай харбаашад эгээл шанга байгаа. Можо бүхэндэ нэрэ солотой, урда жэлнүүдтэ «Алтаргана» наада шүүhэн абьяас бэлигтэй тамиршад нютагаа түлөөлөө. Һүүлэй hүүлдэ эхэнэрнүүдэй ба бүһэтэйшүүлэй хоорондо илагшад элирээ. Эхэнэрнүүдэй хоорондо Амидхааша нютагай Марина Тучинова 35 нюдэ абажа илаа. Удаадахи hууринуудта Буряад Уласай Янжима Ошорова, Шулуутайн Арюна Молонова гараа. Бүһэтэйшүүлэй хоорондо Ага тосхоной Бато Шагдаров олон нюдэ абажа, хүйхэрэй мэргэн болоо. Тэрээнhээ үсөөхэн нюдөөр үлэhэн Улаан-Yдын Олег Цыбикжапов, Алханын Балдан Дугаржапов удаадахи hууринуудые эзэлhэн байха юм. Абарга элирүүлгын мүрысөөндэ 4 мэргэшүүл үлөө. Хэд бэ гэбэл, һур харбалгаар уласхоорондын классай тамирай мастер, дэлхэйн, Европын мүрысөөнүүдэй шанда хүртэгшэ, Олимпиин нааданда хабаадагша Зугаалайн Галсан Базаржапов, Буряад Улас түлөөлһэн, Дулдаргын аймагай Зүдхэли нютагта тоонтотой Баярто Гармаев, һур харбалгаар олон мүрысөөнүүдэй абарга болоһон Дымбрыл Цыбенов (Зугаалай), Олег Цыбикжапов (Буряад Улас) гэгшэд болоно. Эбэр номо ба классическа номоор бэрхээр харбадаг Галсан Базаржаповай табиһан годлинууд бүлэн, ластии тудажа, тэрэ баатарай мэргэн болоо бшуу. Удаадахи hууринуудта Баярто Гармаев, Олег Цыбикжапов, Дымбрыл Цыбенов гэгшэд гараhан байба. Абарга мэргэн болоһон Г.Базаржаповта гол шан – 100 мянган түхэриг, «Нива» унаагай түлхюур барюулагдаа.
Эрдэни ЧИМИТДОРЖИЕВ.
