Агын ипподром дээрэ хамта дээрээ 90 шодоогууд буряад моридоо зайдалжа, найман зайда урилдаа. Үмсэдөө мори үсхэбэрилдэг ажахынууд «Алтаргана» нааданда гүйгөөшэнүүдээ асараа.
Зарим тэдыень нэрлэбэл, Үбэр Байгалай хизаарай Саян Дамдиновай, Бато Дармажаповай, Цокто Бадмаевай, Түмэн Жамбалдоржиевай, Содном Биликтуевай, Очир Долсоновой, Аюша Шагжаевай, Батор Батоцыреновэй, Амгалан Жундуевай, Зорикто Чимитовэй, Эрдэни Норбосамбуевай, Дугар Бимбаевай, Базар Базаргуруевай, Доржи Михайловай, Шэтын гүрэнэй конюшниин, Буряад Уласай Сынге Цыреновэй, Надежда Николаевагай, Гарма Цыбиковэй ба бусадай морид урилдаанда табигдаа һэн. Россиин баруун нютагуудһаа, хизаарта түрэһэн азарга, һоёолон, хизаалан, үреэ, дааган, буряад үүлтэрэй моридой урилдахые харагшад хужарлан хараа. Буряад морид бэеэр набтаршье hаа, боро шэрхи, холын зайнуудые амарангүй гаталха аргатай юм. Нютагай морид эгээл богонинь 3, эгээл утань 16 модоной зайнуудта табигдаһан байгаа.
1600 метр зайда 2 наһатай холимол үүлтэрэй азарга морид урилдаанда табигдаа. Залуу азарга морид урилдаанай урда захые барихые эхинhээ оролдоо. Агын аймагай Будаланай Саян Дамдиновай Джокер азарга (шодоогынь Цыдып Жамсаранов) стартhаа эхилжэ, бэшэ хүлэгүүдые холо орхижо, фиништэ түрүүн ерээ. Удаадахи hууринуудта энэл ажахын Джохар, Джев азарганууд ерээ.
Энэл зайда 2 наһатай гүүн морид урилдаа. Мэдээжэ моришон Доржи Жалсараев Ростислава хээр мориёо өөрөө унажа, түрүүлһэн байна. Буряад Уласай Система хүлэгэй шодоог Иван Корнев, Даши Нимаевай үмсын Фон-Гера жолоодоһон Рабдан Цыденов 2-дохи, 3-дахи болоо.
1600 метр зайда сэбэр үүлтэрэй морид урилдаа. Цокто Бадмаевай Норт Ривер азарга (шодоогынь Бато Марбаев) олон моридые ахижа, солодо хүртөө. Содном Биликтуевай Федерация (шодоогынь Рабдан Цыденов), Түмэн Жамбалдоржиевай Дарт Соник (шодоогынь Цыдып Батоев) удаань ерэжэ, эзэдээ баярлуулаа.
Хоёр наhатай, хизаарта түрэһэн ба буряад үүлтэрэй морид 3200 метрэй зайда гүйлдөө. Буряад үүлтэрэй 138 сантиметр үндэртэй морид табигдаа. Батор Батоцыреновэй Мүндэр (шодоогынь Рабдан Цыденов) түрүүлэн ерээ. Тэрээндэ ахигдаhан Амгалан Жундуевай Дангина хүлэг (шодоогынь Валентин Марков), Зорикто Чимитовэй Джокер хүлэг (шодоогынь Аюр Очиров) 2-дохи ба 3-дахи ерэhэн байна.
Урилдаанай талмайда тэргэтэй хатаршад гаража, 1600 метртэ урилдажа, харагшадай һонирхол татаа. Нэршүүгэй моридые үсхэбэрилдэг Мономах хатарша (шодоогынь Андрей Статных) түрүүлhэн байха юм. Шэтын конезаводой Калиф (шодоогынь Любовь Ксенофонтова), Нэршүүгэй Тартуга хатарша (шодоогынь Николай Статных) гэгшэд удаадахи шангуудта хүртөө.
1800 метртэ сэбэр үүлтэрэй азарганууд урилдаһан байна. Түрүүлһэн моридые нэрлэбэл, Могойтын аймагай «Победа» ажахын морид Табрис (шодоогынь Содном Биликтуев), Шайни Даки (шодоогынь Рабдан Цыденов), Мунко Шираповай Батайск (шодоогынь Бато Марбаев) гэгшэд болоно.
1200 метртэ һоёолон, хизаалан морид хурдануудаа элирүүлжэ, «Победа» ажахын морид Бонапарт (шодоогынь Рабдан Цыденов), Бунчук (шодоогынь Содном Биликтуев) гэгшэд шагналда хүртэжэ, ага-хангилайхидаа ехээр хүхеэһэн байна.
8000 метрэй урилдаанда Булат Цыриторовэй үмсын морин Жаа Эрхэр (шодоогынь Насантогтох) фиништэ 1-дэхи ерээ. «Аргал» ажахын Хас Тамга (шодоогынь Зоригто Батомункуев) ба Буряад Уласай Алыг (шодоогынь Иван Корнев) гүйгөөшэд тус тустаа hубарин ерээ.
Дааган морид 2000 метрэй зайда урилдаа. Эндэ Саян Дамдиновай Азиатка хүлэг (шодоогынь Насантогтох) түрүүлжэ, соло дуудуулаа. Тэрээндэ ахигдаhан Нэршүүгэй Фонетика (шодоогын Зоригто Батомункуев), «Победа» ажахын Фергана (шодоогынь Рабдан Цыденов) гэгшэд hубаряа.
Удаань 3200 метрэй зайда буряад үүлтэрэй морид урилдаанда табигдажа, түрүүшын гурбан hууринуудта тойрогоймнай морид урдалжа, ехэ баяр болоо. Хэд бэ гэбэл, Могойтын «Победа» ажахын Рабдан Цыденовай зайдалhан Фейр Факс, «Аргал» ажахын Зорикто Батомункуевай унаhан Стратег, Түмэн Жамбалдоржиевай Московский клад, (шодоогынь Цырендоржи Долсонов) хүлэгүүд болоно.
Одоошье хүлеэгдэһэн «Алтаргана» нааданай Ехэ шанда хүртэхын түлөө гүйгөөшэд гаража, эгээл ута 16 модо зайда табигдажа, олоной hонирхол татаhан байна. Буряад үүлтэрэй морид 10 дүхэриг гүйлдөө бшуу. Могойтын аймагай «Победа» ажахын Дашибалбар Нимаевай үмсын морин Сахилгаан (шодоогынь Рабдан Цыденов) бэшэ хүлэгүүдые ардаа холо үлөөжэ, 1-дэхи ерээ hэн. Тиигэжэ эзэндээ «Нива» авто-унаа шан асараа.
Эрдэни ЧИМИТДОРЖИЕВ.
