Ага тосхоной түб стадионой ногоон талмай дээрэ 102 бүхэшүүл гурбан шэгнүүртэ хубааржа, бүхэ барилдаагаар мүрысөө. Эрхүүгэй можын Усть-Ордагай тойрогой, Монголой Хэнтэй, Дорнод, Сэлэнгын аймагуудай, Yбэр-Байгалай хизаарай Агын тойрогой, Б уряад ороной аймагуудай тамиршад шуудагай бүhэнүүдhээ таталсажа, бар хүсэеэ үзэлсөө.

Yбэр-Байгалай хизаарые түлөөлжэ, Агын тойрогой хүдөө нютагуудай олон бүхэшүүл можынгоо нэрэ хүндэ хамгаалжа барилдаа. Шиираг шамбай хүбүүднай шадал шандааhаар баян олон бүхэшүүлые газарта шоройдуулаа. Дүрэ буляалдаата ба буряад барилдаагаар шадамар бэрхээр барилдадаг Ага нютагаймнай урдаа хараха бүхэшүүл Цыбик Максаров, Балдан Цыжипов, Бато Дараев, Александр Рабданов, Булат Батоев, Намжил Цыденжапов, Дондок Дылыков, Тамир Гармаев ба бусад бүхэшүүл харагшадай нюдэ хужарлама, баян дүрэтэй барилдаа харуулаа. Дотор дэгээ, хүлһөөнь үргөөд унагаахаа, бүһэһөө баряад шэдэхэ г.м. баян дүрэ мэхэнүүд харуулагдаа. Тэрэ үдэр үглөөнэй сагта бороон ороһон ногоон талмай һолжоруухай болоо. Бэедээ найдлтай олон бүхэшүүл нойтон ногоон дээрэ һолжоржо нуаа. Хэзээшье Буряад ороной тамиршад агынхид гол эсэргүүсэлтэ үгэхые оролдоо бэзэ. Мэдээжэ бүхэ барилдаашан Зорикто Цырендондоповай манда хэлэhээр, Буряад Уласай бүхэшүүл «Алтаргана» нааданай урда тээ Сэлэнгын аймагай Ноёхон нютагта оршодог амаралгын бааза дээрэ hорилго, бэлэдхэл гараа. Буряад оронойхидой гол эсэргүүсэлтэ үгэхэ тамиршад - манай Агын тойрогой буряад хүбүүд байгаа гэжэ тэрэ сэхынь хэлээ бшуу. Тэрэнэй саашань тайлбарилhаар, Этигэлов хамбын, Сурхарбаанай мүрысөөнүүдтэ hүүлэй жэлнүүдтэ Агын талаhаа ерэhэн хүбүүд гол шангуудта хүртэнэ. Буряад Уласай бүхэшүүл бүридэлөөр баһал шанга байгаа гэжэ тэмдэглэхээр.  Алексей Раднаев, Агван Шадапов, Артём Раднаев (Курумкан), Сангади Улзытуев гээд нэрлэхэ болоо һаа, олон юм.

60 кг шэгнүүртэ илагшадые нэрлэбэл, Тамир Гармаев (Зүдхэли), 2.Эрдэм Дамдинов (Гүнэй), Роман Егоров (Буряад Улас).

70 кг шэгнүүртэ 1.Булат Батоев (Шулуутай), 2.Балдан Содномов (Сагаан-Уула), 3.Зандан Цыденов (Хүнхэр).

80 кг шэгнүүртэ Агын тойрогой бүхэ Намжил Цыденжапов гоё hайхан барилдаа харуулжа, үзүүрэй уулзалгада Буряад ороной суута бүхэ Сангади Ульзутуевые унагаажа, амжалта туйлаа. Буряад Уласай Баясхалан Гомбоев 3-дахи болоо.

92 кг хүрэтэр  шэгнүүртэ Зорикто Цырендондопов Монголой бүхэшүүл Жавхалан, Сумьябазар гэгшэдые газарта шоройдуулжа, түрүүшын hуури эзэлээ.

92 кг дээшэ Агын Урда-Агын Цыбик Максаров илалта туйлаа. Цыбигэй удаа Монголой Дорж Анар, Ага-Хангилай Балдан Цыжипов 2-дохи, 3-дахи һууринуудые эзэлһэн байгаа.

Абаргануудай мүрысөөндэ Агын талын абарга Балдан Цыжипов ногоон хибэс дээрэ гараhан бүхэшүүлые унагаажа, «Алтаргана» нааданай хоёр удаа абарга боложо, соло дуудуулаа. Тэрэ хахад финалда суута бүхэ Цыбик Максаровые хүндэхэн уулзалгада шүүһэн байна. Нүгөө хахад финалда Будаланай Цырен Сультимов Угдаанай Алдар Дондоковые диилэһэн байба. Цырен Украинада сэрэгэй тусхай операцида хабаадана, амаралтада нютагаа бусаһан байжа, нааданда хабаадаа гээшэ. Гол уулзалгада Цырен Балданда шүүгдээ.

Эрдэни ЧИМИТДОРЖИЕВ

You have no rights to post comments