Июлиин 23-да Уласхоорондын 14-дэхи "Алтаргана-2020" нааданай хэмжээндэ буряад уран шүлэгэй урилдаан Б-Б. Намсараевай нэрэмжэтэ Агын аймагай номой санда үнгэрөө.
Энэ урилдаанда Монголhоо, Эрхүүгэй можоhоо, Yбэр-Байгалай хизаарhаа, Буряад Уласhаа 16 уран бэлигтэн хабаадаа, 6 шүүгшэд тэдэниие шагнажа дүнгүүдые гаргаа.
Уран бэлигтэн наhанай хоёр хубаарилгаар мүрысөө: 16-35 ба 35-hаа дээшэ наhанай хэмжээндэ. Мүрысөөн 3 шатада үнгэрөө: түрүүшын шатада хабаадагшад гүн ухаанай ба уянгын шэглэлтэй шүлэгүүдые гүйсэдхөө, 2-дохидо эрхим зохёолоо уншаа, түгэсхэлэй шатада 10 минутын туршада шүүгшэдэй нэрлэhэн сэдэбээр ябууд шүлэг зохёогоо юм. Тиин шүүгшэд удаан хугасаа соо хэлсэжэ, дүнгүүдые татаа. Дүримэй ёhоор нэн түрүүн урилдаанда хабаадаhан бэлигтэндэ баталамжанууд барюулагдаа.
Залуушуулай хоорондо Yбэр-Байгалай хизаарай Санжита Аюрова, Эрхүүгэй можын Людмила Сергеева, Yбэр-Байгалай хизаарай Лубсан Бальжуров лауреадууд болоо.
Дээдэ наhанай хабаадагшад соо Yбэр-Байгалай хизаарай Цыбегмит Багдаева, Буряад Уласай Дамдинцырен Доржогутапов, Монгол Уласай Зоригбаатарай Чинзориг дээдын шангуудта хүртэбэд.
Поэтесса Дугарма Батоболотова хоёр ботитой «Ажабайдалай агшан зуура» номоо урмашуулга болгожо, Ринчима Малышевада бэлэглээ. Буряад ороной түлөөлэгшэд шүүгшэдтэ ба Агаяа үргэжэ ябаhан гурбан ахатанда бэлэг сэлэгүүдые баряа бшуу.
Дүн гаргалгын түгэсхэлдэ буряад хэлэн, буряад уран зохёол хүгжэжэ байг гэhэн удхатай үреэлнүүд, баярай үгэнүүд оло дахин хэлэгдээ.
Цымжидма Долгорова.
