«Алтаргана-2020» нааданай хэмжээндэ хоёр үдэрэй туршада hээр шаалгаар мүрысөөн hүр жабхалантайгаар Агын түб стадион дээрэ үнгэргэгдэбэ.
Угсаата арадаймнай наадан хүгжэлтэеэ абажа, зоной hонирхол улам татадаг болонхой гээшэ. Мүрысөөнэй эхилхын урда тээ Агын дасанай санаартан Дондок лама хабаадагшадта амжалта хүсэжэ, «Хии мориной сан» уншаа. Мүрысөөнэй ахамад шүүгшэ Батор Жапов уригдажа, hээр шаалга хадаа гунзэгы удхатай, өөрын гуримтай гэжэ, мүрысөөнэй дүримүүдтэй танилсуулхадаа, сэбэр гараараа шааха, нюдаргаяа юумээр орёогоогүй байха ёһотой, шаахаяа бэлдэжэ байhан үедөө һээртээ шангаар хүрэжэ болохогүй г.м. дүримүүдые тамиршадта ойлгуулаа. Тамиршад нэгэ доро гурбан hээр хухалхадаа, можодоо гурбан нюдэ асарна.
Энэ нааданда илаhан абарга hээршэндэ буряадай үндэһэн тамирай мастерай нэрэ зэргэ олгогдохо гэжэ хэлэгдээ.
Мүрысөөндэ Монгол ба Буряад Уласуудhаа, Эрхүүгэй можоhоо, Красноярскын ба Үбэр Байгалай хизаарнуудhаа 41 можо түлөөлhэн хамта 220 тамиршад хабаадаа. Түрүүшын үдэр дуутай шуутай аадар орожо, мэшээгүүдтэй hээрнүүд нороhон байна.
Һээр шаагшад өөр өөрын дүрэтэй байдаг. Хаража байхада, hургуулиин наhанай хүбүүд бүдүүн зонтой адли мүрысэнэл даа. Ага нютагтаа мэдээжэ болонхой hээршэд хэды олон дабаа гарабашье, алдаа бшуу. Үдэрэй талаан гэжэ байхал байна. Хабаадагшад hээр шаахынгаа урда тээ бэеэ бэлдэнэ. Зариман аниргүй зогсоод, гэнтэ шаана, зариман түер-наяр дэбhэнэ, нэгэн тайзан дээрэ бэшэ, ногоон газар дээрэ мухарин шаана. Зарим тамиршад яарана юм гү, hээрынь гарhаань hугараад хиидэшэнэ. «Джекпот» гээд нэрлэгдэдэг ушар - хабаадагшадай шаахаяа байтарнь, hээрнүүдэй өөрөө хухаршахань үсөөн дайралдаа.
Дүнгүүд наhанай 5 бүлэгөөр татагдаа.
21 наhан хүрэтэр түрүүшын hуурида Үзөөн нютагай «Доодо Элеэ» можын Алексей Очиров, 2-дохидо – Захааминай суглуулагдамал можын Дмитрий Крылов, 3-дахида – Дорнод аймагай Хүдр Мүнх гараа.
21-тэйhээ 30 наhан хүрэтэр: түрүүшын хоёр һуури Захааминай суглуулагдамал можын Аюр Раднаев ба Хэшэгто Раднаев; 3-дахиие – Агын Буряадай тойрогой « Нютаг» можын Баир Дашидоржиев эзэлбэ.
31-тэйhээ 40 наhан хүрэтэр: 1-дэхи – Догойн Элбэк Рыгзынов; 2-дохи –Догойн Баяр Жаргалов; 3-дахи Догойн Тумутов Алдар болоо.
41-тэйhээ 50 наhан хүрэтэр: 1-дэхидэ – «Нютаг» можын Юмдылык Жигмитжамсоев; 2-дохидо – Буряад Уласай суглуулагдамал 2-дохи можын Олег Мункуев; 3-дахида – Ага-Хангил нютагай Баир Намдаков гарабад.
51-тэйhээ дээшэ: 1-дэхи һуурида Захааминай «Хуртага» можын Булат Дарижапов; 2-дохидо – Согто-Хангилай «Ножо» можын Бальжинима Юмсунов; 3-дахида – Шандалиин «Зүүн Үндэр» можын Владимир Цыдыпов хүртөө.
Можонуудай хоорондо түрүүшын hуурида 56 баллтай болоһон Буряад Уласай суглуулагдамал 1-дэхи можо гараа. 2-дохи – 52 баллтай Захааминай суглуулагдамал можо; 3-дахи – 47 баллтай Догойн «Домог -1» можо; 4-дэхи - 45 баллтай Булганай аймаг; 5-дахи – 41 баллтай Агын Буряадай тойрогой «Нютаг» можо болоо.
Абарга һээршэн Алексей Очировта 100000 түхэригэй сертификат, уран гартан Жигжит Баясхалановай урлаһан кубок барюулагдаа. Андрей Ракшаевич Дондупов, үмсын хэрэг эрхилэгшэ Дажинзанова Ирина Шираповна гэгшэд таба-табан мянган тухэригүүдые бэлэглээ. Алексей Васильевич Гергенов Түнхэнэй аймагта оршодог «Аршаан» курортдо амарха путёвко, Урбагаев Александр Сергеевич банхар нохой, Догой һууринай захиргаанай зүгһөө үхэр бэлэгүүд нэрлэгдэбэ.
Мүрысөөнэй һүүлээр абарга һээршэнтэй уулзаһамнай, тэрэ иигэжэ хэлэбэ: «Би Үзөөн нютагта тоонтотойб. Сагаангууд угайб. Шэтын олзын хэрэг эрхилэгшэдэй дээдэ һургуулиин 3-дахи курсын оюутанби. 13-тайhаа hээр шаажа эхилhэн байнаб, Роза Тобоева эжымни баhал hээр шааха дуратай. «Алтаргана» нааданда түрүүшынхеэ хабаадааб. Сэхыень хэлэхэдэ, мүнөөдэр ехэл талаантай байбаб. «Алтан Мундарга» мүрысөөндэ хоёр жэлэй саана хабаадаад, абаргые элирүүлгын мүрысөөндэ 2-дохи hуури эзэлhэнби. Минии hанахада, «Алтарганын» мүрысөөндэ хабаадагшад үсөөн байба».
Түгэсхэлдөө Буряадай һээр шаалгаар федерациин президент Алексей Гергеновэй үгэнүүдые дурадхая: «Гурбан hээр нэгэ доро hубарюулан шаахада, хүндэ гэхэ байнаб. Тиигээшье hаа, хүбүүднай өөрынгөө дүрөөр лэ шааханиинь шаажа, саашаа ошоно. Зунай сагта hээрнүүд дуталдахаяа hанадаг, үбэлдөө үүсын үедэ амар байдаг. Мүнөө «Алтаргана» нааданда «Алтан Мундаргын», Сурхарбаанай, Агын тойрогой мүрысөөнүүдтэ hээр шаалгаар абарганууд болоhон хүбүүд хабаадажа байна. Олон залуу хүбүүд шаажа ябана, тамирай мастерай нэрэ зэргын үгтэжэ эхилхэдэ, хүбүүднай урматайгаар хабаададаг болоо гээшэ ааб даа».
Наталья БАИРОВА.
