Малша буряадта хүнгэн хүлтэй, шэрхи хүлэгhөө дээрэ юумэн байгаагүй. Морин эрдэни эзэеэ хаанаш хүрэтэр хүргэхэ, юунhээшье аршалха шадалтай. Мориёо магтаха, шэмэхэ, буряад эмээл ба тоног зэмсэгынь хэхэ заншал һэргээхын тула «Морин эрдэни» гэһэн мориной тоног зэмсэгэй ба гоёолтонуудай харалга-мүрысөөн үнгэргэгдөө бшуу.
Үбэр Байгалай хизаарай үндэһэн тамир хүгжөөлгын түбэй байшанай зүүн хажууда сэргэдэ 5 һайхан хүлэгүүд уяатай байгаа. Тэндэ эмхидхэгдэһэн мориной заһалай мүрысөөнэй найман хабаадагшадай гурбаниинь лауреадай нэрэ зэргэдэ хүртэжэ, буряад эмээл өөрынгөө гараар хэһэн дархашуулда 65000 түхэриг мүнгэн шангууд, баталамжа, медальнууд барюулагдаа.
Могойтын аймагhаа гарбалтай Ринчин Эрдынеевай дархалhан эмээлые хүсэхэ бүтээл байгаагүй. Тэрэ Агын дасанай зурхайша юм. Урлалда улигтай, баруун хуасай угай лама санаартан 2 жэлэй туршада урданай урлалай ёһо баримталжа, өөрынгөө гараар аргагүй гоё буряад эмээл дархалһан байна. Тиихэдээ эмээлдээ мүнгэн тоборюулга, гоёолтонуудые уранаар сохижо һуулгаа.
Р.Эрдынеев.
Захааминай аймагай Санага нютагай угай дархан Бэлигто Нохоров хонгоодорой эмээл хээ. Мориной бэе холгоохогүйн тула hарлагай зөөлэн нооhоор хударга хээд, арhаар бүриhэн байна. Маюузын даруулга, баабар 925 пробын сагаан мүнгөөр хээ. Чеканка хэдэг. Эхэ эсэгынгээ хэжэ ябаhан буряад гоё эмээл тэрэ зандань дархалаарай гэhэн захяаень дүүргэдэг.
Б.Нохоров.
Эрхүүгэй можын Оhын аймагай хутаанхан айл хотоной Фёдор Тулохонов баруун буряадай эмээл дархалаа. Уран зурааша, реставратор багадаа үбгэ эсэгэтэеэ cуг түлеэндэ, уhанда, үбhэндэ ошолсодог, мориндо дуратай байһан тухайгаа мэдүүлээ.
Ф.Тулохонов.
Иигэжэ элинсэг эсэгэнэрэймнай хэжэ ябаhан ажал, урлал дэмжэгдэжэ, саашадаа һалбаран хүгжэхэнь лабтай.
Жалсан ЛУБСАНДАШИЕВ.
