«Алтаргана» нааданай үедэ буряад арадай ёһо заншал, онсо шанар шэнжэ, доторой байдал харуулһан дүрэ-зурагуудай үзэсхэлэн дэлгээгдэжэ, харагшадай һонирхол татадаг юм. Агын хүүгэдэй уран урлалай һургуулиин байшан соо бүгэдэ буряадай фестивалиин уран фотографиин харалга-мүрысөөн үнгэргэгдэжэ, Үбэр Байгалай хизаарай, Буряад Уласай, Эрхүү можын, Монгол ороной 21 фотографууд 107 фото-зураг харуулаа.
Тэдэнэй дунда хото городто ажаһуудаг дээдэ гарай мэргэжэлтэ фотографууд ба хүдөөдэ мал харадаг һайн дуранай фото-зураг буулгагшад байгаа. Жэшээнь, мэдээжэ фотографууд Александр Гармаев, Евгений Епанчинцев гэгшэд Москва хотын «ИТАР-ТАСС» гэһэн мэдээсэлэй агенствын ажалтадтай суг хүдэлдэг юм. Буряад ороной эгээл эрхим мэргэжэлтэ фотографууд Сергей Тасасенко, Сергей Ильин, Евгений Коноплёв гэгшэд «Алтарганын» фото-зурагай мүрысөөндэ хабаадаа.
«Буряад арад» гэһэн янзада Буряад ороной Сергей Ильин, Эрхүү можын Иван Алсаев ба Yбэр Байгалай хизаар түлөөлһэн Андрей Бекетов гэгшэд лауреадай нэрэ зэргэдэ хүртөө бшуу. Энэ янзада буряад хүнэй абари зан, досоохиие, али бүлэг зониие харуулһан дүрэ-зурагууд табигдаха эрилтэтэй һэн.
«Минии түрэл нютаг» гэһэн 2-дохи янзада Евгений Епанчинцев (Үбэр Байгалай хизаар), Александр Гармаев (Буряад Улас), Сухбаатар Халиунаа (Монгол ороной Дорнод аймаг) гэгшэд оройлжо шалгараа.
«Александр Гармаевай фото-зурагууд алиш талаараа жэшэшэгүй дээшэ байгаа. Сухбаатар Халиунаа гэжэ эхэнэрэй буулгаһан «Зөөдэл», Ага тосхоной Андрей Бекетовэй «Мэргэн годлиин эшхэрээн», Иван Алсаевай «Амтатайхан» гэһэн фото-зурагуудые ба Буряад ороной фотографуудай ажалнуудые шэлээбди. Зүгтөө хүдөөдэ ондоо ажал хэдэг һайн дуранай фотограф үдэр бүри фото-зураг буулгадаг ТАСС-ай мэргэжэлтэ фотографтой яагаад мүрысэхэ һэн даа. Тэрэмнай ГТО үгэжэ байhан хүнэй олимпиин наадануудай абаргатай мүрысэжэ байһандал адли болоно. Тиимэhээ энэ конкурсын дүнгүүдые мэргэжэлтэ ба hайн дуранай фотографуудай дунда амяарлахаар байна» - гэжэ жюриин гэшүүн, Россиин Федерациин соёлой габьяата хүдэлмэрилэгшэ, мэдээжэ фотограф Фёдор Машечко хэлэһэн байна.
«Алтаргана» фестивалиин уран фотографиин конкурсын илагшадта гоёор урлаһан гуу медальнууд, баталамжанууд, 40000 түхэригэй сертификадууд барюулагдаа бшуу.
Жалсан ЛУБСАНДАШИЕВ.
